Qazaqstan Iordanııanyń dron qurastyrý salasyna qyzyǵýshylyq tanytty

ASTANA. KAZINFORM – Qazaqstan Iordanııanyń dron qurastyrý salasyna qyzyǵýshylyq tanytyp otyr. Bul týraly búgin Aqordada BAQ ókilderiniń saýalyna jaýap bergen Tsıfrlyq damý ınnovatsııalar jáne aeroǵarysh ónerkásibi mınıstri Jaslan Mádıev aıtty.

– Iordanııalyq áriptestermen tsıfrlyq damý, aqparattyq júıelerdi qurý, eGov ekojúıesimen bólisý boıynsha birneshe áleýetti jobamyz bar. Bul elde dron salasy jaqsy damyǵan. Osydan birneshe aı buryn Iordanııaǵa baryp keldim. Olardyń dron salasyn zerttedik. Dron dızaınyn, drondardy qurastyrý zaýytyn, aqparattyq júıelerin, qosymshalaryn kórdik. Olar osy tájirıbelerimen bólisýge daıyn, - dedi mınıstr.

Onyń atap ótýinshe, Iordanııa azamattyq ta, áskerı drondar da shyǵarady. Dronǵa qarsy júıesi de bar. 

– Qazir biz drondardy birlesip óndirý jaıynda ýaǵdalastyq dep otyrǵanymyz joq. Degenmen, Qazaqstan bul tájirıbeni jan-jaqty zerdelep jatyr. Taıaý bolashaqta Qazaqstanda dron ındýstrııasy jaqsy damıtyndyǵyn joqqa shyǵarmaımyn, - dedi Jaslan Mádıev. 

Buǵan deıin Qasym-Jomart Toqaev Aqordada Iordanııa Korolin qarsy alǵanyn jazǵan edik. 

Esterińizge sala ketsek, keshe Prezıdent Qasym-Jomart Toqaev Iordanııa Korolin Astana áýejaıynan qarsy alǵan edi. 

Mártebeli meıman mingen bortty el shekarasynan elordaǵa deıin Qazaqstan Respýblıkasy Áýe qorǵanysy kúshteriniń ushaqtary alyp júrdi.