Qazaqstan Iordanııamen ózara tıimdi seriktestikti ilgeriletýge aıryqsha mán beredi — Prezıdent
ASTANA. KAZINFORM — Qazaqstan Iordanııamen ózara tıimdi seriktestikti ilgeriletýge aıryqsha mán beredi. Bul týraly búgin Aqordada elimizge resmı saparmen kelgen Iordanııa Koroli II Abdalla ben ál-Hýseınmen keńeıtilgen quramdaǵy kelissóz barysynda Memleket basshysy Qasym-Jomart Toqaev aıtty.
— Búginde Qazaqstan men Iordanııa arasyndaǵy qarym-qatynas sońǵy 30 jyl ishindegi eń jemisti kezeńnen ótip jatyr. Qazaqstan Sizdiń elińizben ózara tıimdi seriktestikti ilgeriletýge aıryqsha mán beredi. Bul da ýaqyt synynan ótken. Shyndyǵynda da Siz qazirgi álemdegi óte senimdi seriktessiz. Biz Sizdiń ekijaqty qarym-qatynasymyzdy damytý jolyndaǵy eńbegińizdi joǵary baǵalaımyz. Sonymen qatar, Sizdiń kóshbasshylyq qasıetińizdi, kóregendigińizdi jáne aımaǵyńyzda da, jahandyq deńgeıde de beıbitshilik pen kelisimdi nyǵaıtýdaǵy mańyzdy rólińizdi atap ótkim keledi, — dedi Qasym-Jomart Toqaev.
Memleket basshysy II Abdalla ben ál-Hýseınniń basshylyǵymen Iordanııa Taıaý Shyǵystaǵy beıbitshilik pen tynyshtyqtyń núktesine aınalǵanyn atap ótti. Sondaı-aq Qazaqstan Prezıdenti retinde Iordanııaǵa alǵashqy resmı saparyn eske aldy.
— Atalǵan sapar shyn máninde óte nátıjeli ótti jáne ekijaqty yntymaqtastyǵymyzǵa tyń serpin berdi. Sizdiń búgingi saparyńyz da Qazaqstan men Iordanııa arasyndaǵy ózara qarym-qatynastardy odan ári ilgeriletip, jańa deńgeıge kóteretinine senimdimin. Sondaı-aq, kelissózderimizdiń keıbir tustaryna toqtala ketkim keledi. Búgin biz bıznes, memleketter arasynda 15-ten astam kelisimge qol qoıamyz. Bul qujattar yntymaqtastyǵymyzdyń túrli salalaryn qamtıdy. Búgingi Qazaqstan- Iordanııa bıznes-forýmy yntymaqtastyǵymyzǵa jańa serpin beretine senemiz, — dedi Prezıdent.
Qasym-Jomart Toqaev Qazaqstan men Iordanııada ekonomıka men saıasat salasyndaǵy ortaq pikirlestik qana emes, tereń mádenı baılanystar da biriktiretindigine nazar aýdartty.
— Kelissózderimizdiń qorytyndysy retinde kólik, energetıka, logıstıka, aýyl sharýashylyǵy, IT jáne tsıfrlandyrý, sondaı-aq densaýlyq saqtaý men farmatsevtıka sekildi belgili bir basym salalarda naqty kelisimderge qol jetkiziletinine kámil senemin, — dedi Memleket basshysy.
Buǵan deıin Qasym-Jomart Toqaev Aqordada Iordanııa Korolin qarsy alǵanyn jazǵan edik.
Esterińizge sala ketsek, keshe Prezıdent Qasym-Jomart Toqaev Iordanııa Korolin Astana áýejaıynan kútip alǵan edi.