Qazaqstan Iordanııamen erkin saýda aımaǵy týraly bastamany qoldady
ASTANA. KAZINFORM – Úkimette Premer-mınıstrdiń orynbasary – Ulttyq ekonomıka mınıstri Serik Jumanǵarınniń tóraǵalyǵymen syrtqy saýda saıasaty jáne halyqaralyq ekonomıkalyq uıymdarǵa qatysý máseleleri jónindegi vedomstvoaralyq komıssııanyń otyrysy ótti.
Úkimettiń baspasóz qyzmeti habarlaǵandaı, Qazaqstan men Iordanııa arasyndaǵy ekijaqty qatynastardy nyǵaıtý jáne ózara tıimdi saýda-ekonomıkalyq yntymaqtastyqty tereńdetý maqsatynda VAK otyrysynda arab memleketi Iordanııamen erkin saýda aımaǵy týraly kelisim jasasý múmkindigi jónindegi bastama qaralyp, qoldaý tapty. Saýda jáne ıntegratsııa mınıstrligi usynystardy Eýrazııalyq ekonomıkalyq komıssııaǵa joldap, ony EAEO elderimen talqylaıdy.
Іshki naryqty munaı ónimderimen qamtamasyz etý jónindegi mindetterdi nazarǵa ala otyryp, talqylaý qorytyndysy boıynsha QR aýmaǵynan benzındi, dızel otynyn, munaı ónimderiniń jekelegen túrlerin avtomobıl jáne temirjol kóligimen áketýge tyıym salýdy uzartý týraly sheshim qabyldandy.
Sondaı-aq 1 sáýirden bastap 6 aı merzimge Qazaqstan aýmaǵyna jumyrtqa ákelýge ýaqytsha tyıym salý týraly sheshim qabyldandy.
Kartop baǵasynyń qubylmalylyǵyn jáne eldegi maýsymdyq qordyń azaıýyn eskere otyryp, VAK otyrysynda jańa ónim jınalǵanǵa deıin úshinshi elderden kartopty bajsyz ákelý múmkindigi talqylandy. Osyǵan oraı tıisti ótinish Eýrazııalyq ekonomıkalyq komıssııaǵa jiberiledi
Et ónimderin óndirýdi ulǵaıtý maqsatynda analyq mal basyn áketýge tyıym salýdy uzartý jáne buqalar men qoshqarlardy áketýge sandyq shekteý qoıý týraly sheshim qabyldandy. Tıisti buıryq Aýyl sharýashylyǵy mınıstrligi tarapynan shyǵarylady.