«Qazaqstan ınjınırıngtiń» aktsııalary Qorǵanys jáne aeroǵarysh ónerkásibi mınıstrligine ótedi
ASTANA. QazAqparat - «Qazaqstan ınjınırıng» UK» AQ-nyń aktsııalary «Samuryq-Qazyna» Ulttyq ál-aýqat qory» AQ-dan Qorǵanys jáne aeroǵarysh ónerkásibi mınıstrligine beriletin boldy. Bul týraly «Ádilet» QR normatıvtik-quqyqtyq aktileriniń aqparattyq-quqyqtyq júıesiniń saıtynda jazylǵan, dep habarlaıdy QazAqparat tilshisi.
Qazaqstan Respýblıkasy Úkimetiniń 2018 jyldyń 3 shildesindegi ««Qazaqstan ınjınırıng» (Kazakhstan Engineering) Ulttyq kompanııasy» aktsıonerlik qoǵamynyń keıbir máseleleri týraly» Qaýlysyna sáıkes, «Samuryq-Qazyna» Ulttyq ál-aýqat qory» AQ-ǵa tıesili «Qazaqstan ınjınırıngtiń» jalpy sany 21 476 802 dana bolatyn 100 paıyz aktsııasy óteýsiz berý jolymen syıǵa tartý kelisimi negizinde memlekettik menshikke ıelikten shyǵarylady.
Qaýly negizinde QR Qarjy mınıstrliginiń memlekettik múlik jáne jekeshelendirý komıtetine zańnamada kórsetilgen merzim ishinde kompanııa aktsııalaryn Qorǵanys jáne aeroǵarysh ónerkásibi mınıstrligine tapsyrý quqyǵyn, memlekettik paketti paıdalanýdy qamtamasyz etý ókimi beriledi.
Dál osy Qaýly boıynsha Qorǵanys jáne aeroǵarysh ónerkásibi mınıstrligi men olardyń vedomstvolarynyń basqarýyndaǵy uıymdardyń tizimin kelesi podpýnkttermen tolyqtyrylady 3) kelesi mazmuny: «3) ««Qazaqstan ınjınırıng» Ulttyq kompanııasy» aktsıonerlik qoǵamy (Kazakhstan Engineering)».
