«Qazaqstan ınjınırıng» kompanııasynyń qandaı aktıvteri jekeshelendirildi
«Jekeshelendirýdiń 2021-2025 jyldarǵa arnalǵan keıbir máseleleri týraly» Úkimettiń 2020 jylǵy 29 jeltoqsandaǵy № 908 qaýlysyn qaıta qaraýǵa qatysty depýtattyq saýaldaryńyzdy qarap, kelesini habarlaımyn. Úkimettiń atalǵan qaýlysymen Jekeshelendirýdiń 2021-2025 jyldarǵa arnalǵan keshendi jospary, sondaı-aq jekeshelendirýge jatatyn jáne básekelestik ortaǵa berýge usynylatyn uıymdardyń tıisti tizbeleri bekitilgen, onyń ishinde «Qazaqstan ınjınırıng» UK» AQ (budan ári – Kompanııa) 8 aktıvi: «Semeı ınjınırıng» AQ, «Qazaqstandyq avıatsııalyq ındýstrııa» JShS, «Steel Manufacturing» JShS, «S.M. Kırov atyndaǵy mashına jasaý zaýyty» AQ, «Tynys» AQ,» «QI» 811 Avtojóndeý zaýyty» AQ, «Petropavl aýyr mashına jasaý zaýyty» AQ jáne «Munaımash» AQ», - dedi Úkimet basshysy jaýabynda.
Onyń dereginshe, qazirgi ýaqytta mamandandyrýdy, eńbek ujymyn jáne jumys oryndaryn saqtaý boıynsha negizgi sharttar qoıylyp, básekelestik ortaǵa konkýrstyq negizde satý arqyly «Tynys» AQ, «QI» 811 Avtojóndeý zaýyty» AQ jáne «Munaımash» AQ berildi.
«Tutastaı alǵanda, buryn jeke basqarýǵa berilgen qorǵanys-ónerkásip kesheni uıymdarynyń qyzmetine memlekettik monıtorıng olardyń qosarlanǵan maqsattaǵy ónimniń jappaı óndirisin odan ári masshtabtaı otyryp, ozyq ázirlemelerdiń kópshiligin iske asyrǵanyn kórsetedi. Sonymen qatar, elimizdiń Qarýly Kúshteri men áskerı qaýipsizdiginiń jaýyngerlik qabilettiliginiń múddelerin eskere otyryp, joǵaryda kórsetilgen tizbelerden (Úkimettiń 2022 jylǵy 2 tamyzdaǵy № 523 qaýlysy) kompanııanyń 2 strategııalyq maqsattaǵy áskerı tehnıkany shyǵaratyn kompanııanyń úsh kásiporny – «Semeı ınjınırıng»AQ (tank jóndeý zaýyty), «Qazaqstandyq avıatsııalyq ındýstrııa» JShS (avıajóndeý zaýyty), «Steel Manufacturing» JShS (patrondar óndirisi) alyp tastaldy. Budan basqa, búgingi kúni Kompanııa aktıvterin ótkizý tásilderi qaıta qaraldy. Olar birinshi kezeńde 51 paıyzdan aspaıtyn úlesti jáne ekinshi kezeńde 49 paıyzyn satýdy kózdeıdi», - dedi Álıhan Smaıylov.
Premer-Mınıstrdiń túsindirýinshe, bul shara, eń aldymen, áleýetti ınvestorlardyń qarajaty esebinen ótkiziletin kásiporyndardyń óndiristik qýatyn keńeıtý, onyń ishinde óndiriletin ónim nomenklatýrasyn keńeıtý, zaýyttar aýmaǵynda oqý korpýstar men jataqhanalar qurý arqyly áleýmettik jaǵdaılardy jaqsartý, qosymsha ınvestıtsııalaýdy talap etetin bastalǵan ınvestıtsııalyq jobalardy iske asyrýdy jalǵastyrý maqsatynda engizildi.
«Qalǵan mınorıtarlyq úlesti ótkizý kórsetilgen sharttar men áleýetti satyp alýshynyń aldyna qoıylǵan mindetterdi iske asyrǵannan keıin josparlanady. Sonymen qatar, aktıvterdi ótkizý kezinde áleýetti satyp alýshylarǵa qyzmet beıinin (mamandanýyn), shtat sanyn saqtaý, bar bereshekti óteý jáne basqa da birqatar talaptar sııaqty mindetti sharttar qoıý kózdeledi. Áıtpese, buryn jasalǵan satyp alý-satý sharttary belgilengen tártippen buzylady», - dedi ol.
