«Qazaqstan Injınırıng» basshysynyń burynǵy orynbasary aıyppul tóleıtin boldy

Sottalǵandar men olardyń qorǵaýshylary jazǵan apellıatsııalyq shaǵymy 2 aqpan kúni qaraldy jáne qaýlysy «Sot kabınetinde» jaryq kórdi.

Onda sot alqasynyń Qylmystyq ister jónindegi mamandandyrylǵan aýdanaralyq áskerı sottyń Qanat Sultanbekovke, Gıl Smolınskı (Smolinski Gil), Mberekrehım Ǵabdýl-Kabırov jáne Muhtar Qarabekovke qatysty 2017 jylǵy 29 qarashada shyǵarylǵan úkimdi ózgertkeni aıtylǵan.

«Sultanbekov Qanat Tańataruly men Gıl Smolınskıge qatysty bas bostandyǵynan aıyrý túrindegi jaza úkiminiń kúshi joıylsyn. Q.Sultanbekovke qatysty QK 55-baby, 4-bólimin qoldaný arqyly 366-baby, 4-bólimi boıynsha para somasynyń eki eselengen kóleminde - 2 139 834 310 teńge kóleminde aıyppul salynsyn. QK 62-baby, 6-bólimi boıynsha taǵaıyndalǵan jazany 334 310 teńgege jeńildetip, túpkilikti jaza - 2 139 500 000 teńge kóleminde aıyppul taǵaıyndalsyn», - delingen QR Áskerı sotynyń qylmystyq ister boıynsha sot alqasynyń qaýlysynda.

Sonymen birge, Izraıl azamaty Gıl Smolınskıge apellıatsııalyq ınstantsııa sheshimimen bas bostandyǵynan aıyrý jazasy aıyppulǵa aýystyryldy.

«Gıl Smolınskı QK 55-baby, 4-bólimin qoldaný arqyly 367-baby, 4-bólimi boıynsha para somasynyń úsh eselengen kóleminde - 536 478 165 teńge aıyppul salynsyn. QK 62-baby, 6-bólimi negizinde belgilengen jazany 478 165 teńgege jeńildetip, túpkilikti jaza - 536 000 000 teńge aıyppul taǵaıyndalsyn», - delingen qujatta.

Qujatta habarlanǵandaı, «Qanat Sultanbekov pen Gıl Smolınskıge qatysty qoldanylǵan «qamaýǵa alý» bultartpaý sharasynyń kúshi joıyldy jáne bosatyldy».

Eske sala ketsek, ótken jyldyń qarasha aıynda Qanat Sultanbekovke 10 jylǵa bas bostandyǵynan aıyrý jazasy taǵaıyndalyp, ómir boıy memlekettik qyzmette laýazym atqarýǵa tyıym salynǵan edi.