Qazaqstan ınvestorlar úshin ashyq esik saıasatyn jalǵastyrady

NUR-SULTAN. QazAqparat – Qazaqstan ınvestorlar úshin ashyq esik saıasatyn ári qaraı da jalǵastyra beredi. Bul týraly QR Prezıdenti janyndaǵy Sheteldik ınvestorlar keńesiniń 34-jalpy otyrysynda Memleket basshysy Qasym-Jomart Toqaev aıtty, dep habarlaıdy QazAqparat tilshisi.

«Investıtsııalyq ahýaldy odan ary jaqsartý jáne ınvestorlardyń quqyǵyn qorǵaýdy kúsheıtý - Qazaqstannyń strategııalyq maqsaty ekenin atap ótkim keledi. Qazaqstan Ortalyq Azııada ınvestorlar úshin barynsha tartymdy baǵyt retinde qalyp otyr. Ótken jyly sheteldik áriptester ekonmıkamyzǵa shamamen 24 mlrd dollar saldy. Bul onyń aldyndaǵy jylmen salystyrǵanda 38 paıyzǵa joǵary. Qazirdiń ózinde ekonomıkanyń negizgi emes sektorynda elimizge kelgen barlyq sheteldik ınvestıtsııanyń 60 paıyzdan astamy salynǵan», - dedi Memleket basshysy.

QR Prezıdenti búginde memleket ınvestorlarǵa júzden astam fıskaldy jáne fıskaldy emes qural usynatynyn aıtty.

«Qazaqstan ınvestorlar úshin ashyq esik saıasatyn budan keıin de jalǵastyra beredi. Qazirgi geosaıası túpki mánde sheteldik kompanııalarmen tikeleı yntymaqtastyq ornatý úshin ınstıtýtsıonaldy jaǵdaı jasaýǵa daıynbyz. Bul Qazaqstanǵa sheteldik kompanııalardyń kóship kelýin nemese birlesken kásiporyn qurýyn qamtıdy. Biz ınnovatsııany damytýǵa jáne adamı kapıtal deńgeıin arttyrýǵa basa mán beremiz», - dedi Qasym-Jomart Toqaev.