Qazaqstan ınvestıtsııalar úshin qaýipsiz óńir retindegi mártebesin nyǵaıtyp keledi
ASTANA. KAZINFORM — Bas prokýrordyń birinshi orynbasary Jandos Ómirálıev Qazandaǵy ekonomıkalyq forýmda Qazaqstan tájirıbesin tanystyrdy, dep habarlaıdy Investorlardyń quqyqtaryn qorǵaý komıtetiniń baspasóz qyzmeti.
QR Bas prokýratýrasy XVII «Reseı — Islam álemi: Qazan forýmy» halyqaralyq ekonomıkalyq forýmynda halyqaralyq qaýymdastyqqa ınvestorlardyń quqyqtaryn qorǵaý boıynsha qazaqstandyq tájirıbeni pash etti.
Bas prokýrordyń birinshi orynbasary Jandos Ómirálıev ınvestıtsııalardy qorǵaýdyń jańa modelin qalyptastyrý tájirıbesi týraly aıtty.
Forým qatysýshylary aldynda sóz sóılegen ol kapıtal úshin jahandyq báseke jaǵdaıynda quqyqtyq boljamdylyq, ashyqtyq jáne ınstıtýttarǵa degen senim turaqty ekonomıkalyq ósimniń negizgi faktoryna aınalyp otyrǵanyn atap ótti.
— Qazaqstan ınvestorlar úshin qolaıly ári boljamdy orta qalyptastyrýdy júıeli túrde jalǵastyryp keledi. Búginde biz bızneske tek ashyq jumys sharttaryn ǵana emes, sonymen qatar naqty quqyqtyq qorǵaý tetikterin usynamyz. Árbir ınvestıtsııalyq jobanyń artynda zań kepildigi men memlekettiń jaýapkershiligi turýy tıis, — dedi Jandos Ómirálıev.
Onyń aıtýynsha, Qazaqstan Prezıdentiniń tapsyrmasyna sáıkes 2024 jyldan bastap prokýratýra organdary mańyzdy ınvestıtsııalyq jobalardy iske asyrýdyń barlyq kezeńinde súıemeldep keledi.
Osy ýaqyt ishinde prokýrorlar 2 myńnan astam ınvestordyń quqyǵyn qorǵap, ákimshilik kedergilerdi joıyp, 270 ınvestıtsııalyq jobanyń iske qosylýyn qamtamasyz etti. Sonyń nátıjesinde shamamen 30 myń jańa jumys orny ashyldy.
Instıtýtsıonaldyq reformalarǵa da erekshe nazar aýdaryldy. Prezıdenttiń Jarlyǵymen 2025 jylǵy jeltoqsanda Bas prokýratýra janynan Investorlardyń quqyqtaryn qorǵaý komıteti qurylyp, Bas prokýrorǵa Investıtsııalyq ombýdsmen fýnktsııalary berildi.
— Komıtettiń qurylýy ınvestıtsııalyq jobalardy iske qosýdan bastap olardyń tolyqqandy jumys isteýine deıin ınvestorlardy naqty quqyqtyq qorǵaý júıesin qalyptastyrýdaǵy mańyzdy qadam boldy, — dep atap ótti Bas prokýrordyń birinshi orynbasary.
Búginde prokýrorlar 36 elden kelgen sheteldik seriktesterdiń qatysýymen jalpy quny shamamen 200 mıllıard AQSh dollaryn quraıtyn 3 myńǵa jýyq ınvestıtsııalyq jobany súıemeldep otyr.
Forým qatysýshylaryna ınvestıtsııalyq jobalardy monıtorıngteýge arnalǵan, táýekelder men kidiristerdi jáne problemalyq máselelerdi naqty ýaqyt rejıminde anyqtaýǵa múmkindik beretin tsıfrlyq quraldar da tanystyryldy.
Taǵy bir mańyzdy jańashyldyq — Komıtet janynan memleket pen bıznes arasyndaǵy dıalog alańyn qurý. Bul alań daýlardy sotqa deıin retteýge baǵyttalǵan.
Sóz sońynda Jandos Ómirálıev ınvestıtsııalardy qorǵaý salasyndaǵy halyqaralyq yntymaqtastyqtyń mańyzyn atap ótip, ınvestıtsııalyq ahýal men bıznestiń quqyqtyq qaýipsizdigi máseleleri boıynsha seriktes elderdiń turaqty saraptamalyq platformasyn qurý múmkindigin qarastyrýdy usyndy.
Forým aıasynda qazaqstandyq delegatsııa Reseı men Ázerbaıjan ókilderimen ekijaqty kezdesýler de ótkizdi. Investorlardyń quqyqtaryn qorǵaý komıtetin qurý jáne ınvestıtsııalyq jobalardy prokýrorlyq súıemeldeý tetikterin engizý boıynsha Qazaqstan tájirıbesi sheteldik seriktesterdiń erekshe qyzyǵýshylyǵyn týdyrdy.
Budan buryn Astana prokýratýrasy ınvestordyń quqyǵyn qorǵap, 20 mln dollarlyq jobany iske qosqanyn jazǵanbyz.
