UNCTAD: Qazaqstan ınvestıtsııa tartý boıynsha Ortalyq Azııada kósh bastap tur
ASTANA. KAZINFORM — Qazaqstan Ortalyq Azııadaǵy tikeleı sheteldik ınvestıtsııalardyń jıyntyq kólemi boıynsha kósh bastap tur. Bul týraly Qazaqstan Respýblıkasy AQSh-taǵy Elshiliginiń The Times of Central Asia basylymynda jarııalanǵan maqalasynda aıtylǵan.
- Qazaqstan Prezıdenti Qasym-Jomart Toqaevtyń Amerıka Qurama Shtattaryna sapary iri halyqaralyq korporatsııalarmen jáne qarjy ınstıtýttarymen uzaq merzimdi ınvestıtsııalaý, óndiristi oqshaýlaý jáne Qazaqstannyń álemdik qun tizbegine ıntegratsııalaný máselelerine baǵyttalǵan mazmundy kelissózder júrgizýge múmkindik berdi, - dep jazylǵan maqalada.
Aıta ketsek, Prezıdent Qazaqstannyń Aýyl sharýashylyǵy mınıstrligi men Mars kompanııasy arasynda jalpy somasy 180 mıllıon dollarǵa jýyqtaıtyn ınvestıtsııalyq kelisimge qol qoıylǵanyn quptaǵan bolatyn. Kompanııa Alataý qalasynda úı janýarlaryna arnalǵan jem zaýytyn salýdy josparlap otyr. Joba aýyl sharýashylyǵy shıkizatyn ozyq óńdeýdi jáne joǵary qosylǵan quny bar ónim óndirýdi kózdeıdi. Bas dırektory Pol Veıraých Qazaqstandaǵy nysan kompanııanyń Ortalyq Azııa men oǵan jaqyn aımaqtarǵa shyǵý múmkindigin keńeıtetin bazaǵa aınalatynyn atap ótken edi.
Sondaı-aq Elshilik kelissózderdiń jeke raýndy densaýlyq saqtaý salasyna arnalǵanyna toqtalady. Qasym-Jomart Toqaev pen Ashmore Group halyqaralyq ınvestıtsııalyq kompanııasynyń basshysy Mark Kýmbs ózara tıimdi birlesken jobalardy iske asyrý máselelerin talqylaǵan bolatyn. Ashmore Healthcare International kompanııasy men «Samuryq-Qazyna Invest» JShS birlesip, Qazaqstanda halyqaralyq klınıka salýdy josparlap otyr. Bul bastamaǵa álemdik deńgeıdegi medıtsına operatory – Mount Sinai Health System kompanııasyn tartý kózdelgen.
- Bastama Qazaqstannyń medıtsınalyq ınfraqurylym men medıtsınalyq týrızmdi damytý strategııasyna, sondaı-aq ekonomıkanyń joǵary tehnologııalyq sektorlaryna baǵyttalǵan «Ashyq ınvestıtsııalyq seriktestik» baǵdarlamasyna sáıkes keledi, - dep jazady Elshilik.
Sapar barysynda avıatsııa taqyryby da qamtylǵany, Qazaqstan Prezıdenti U.S. International Development Finance korporatsııasynyń (DFC) atqarýshy dırektory Ben Blekti qabyldap, bedeldi halyqaralyq qarjy ınstıtýty basshysymen kezdesýde ınvestıtsııalyq yntymaqtastyqty keńeıtý jáne birlesken jobalardy júzege asyrý perspektıvasy talqylanǵany aıtylady.
Sondaı-aq maqalada BUU Saýda jáne damý jónindegi konferentsııasy (UNCTAD) usynǵan 2025 jylǵy Dúnıejúzilik ınvestıtsııalyq esep málimetteri jazylǵan.
- World Investment Report 2025 (UNCTAD) baıandamasy boıynsha Qazaqstan - Ortalyq Azııadaǵy tikeleı sheteldik ınvestıtsııalar (TShI) qory boıynsha aıqyn kóshbasshy. 2024 jyly Qazaqstan ekonomıkasyndaǵy TShI qory shamamen 151 mlrd dollar boldy, bul Túrikmenstannyń (shamamen 45 mlrd dollar), Ózbekstannyń (shamamen 17 mlrd dollar) jáne Qyrǵyzstan men Tájikstannyń (árqaısysy shamamen 4 mlrd dollar) kórsetkishterinen aıtarlyqtaı asyp tústi, - dep keltiriledi.
Qazaqstan Respýblıkasynyń AQSh-taǵy elshiligi Vashıngtondaǵy kelissózder elimizdiń halyqaralyq ınvestorlar úshin ulttyq naryqtyń turaqtylyǵy men ashyqtyǵyn rastaýdy kózdeıtin bir rettik ınvestıtsııalyq mámilelerden góri uzaq merzimdi ınstıtýtsıonaldyq seriktestik qurýǵa degen umtylysyn kórsetetinin aıtyp túıindegen.
Eske salsaq, 19 aqpan kúni Prezıdent Qasym-Jomart Toqaev Vashıngtonǵa jumys saparymen bardy.
Prezıdent Qasym-Jomart Toqaev Beıbitshilik keńesiniń alǵashqy otyrysynda sóz sóıledi.
Sapar barysynda Prezıdent AQSh-ta turatyn jáne bilim alyp júrgen Qazaqstan azamattarymen de kezdesti.
Sondaı-aq amerıkalyq The National Interest jýrnalynda Memleket basshysy Qasym-Jomart Toqaevtyń maqalasy jarııalandy.