Qazaqstan ınvestıtsııalarynyń 50% Eýropa elderinen túsken – Jeńis Qasymbek

NUR-SULTAN. QazAqparat - QR Premer-Mınıstriniń orynbasary Jeńis Qasymbek Qazaqstanǵa ınvestıtsııa salǵan memleketter týraly baıandady, dep habarlaıdy QazAqparat tilshisi.

«Táýelsizdik alǵan sátten beri elimizge 120-dan astam elden 330 mlrd AQSh dollary bolatyn ınvestıtsııa tústi. Onyń 50% astamyn Eýropalyq Odaq elderi salǵan. Onyń ishinde Shveıtsarııadan 25,8 mlrd, Frantsııa (16,1), Italııa, Belgııa, Nıderlandy elderi bar. Ekinshi orynda turǵan AQSh Qazaqstanǵa túsken tikeleı ınvestıtsııalardyń 15% ıelendi nemese 48,4 mlrd AQSh dollaryn qurady. Shamamen 5% - Ulybrıtanııa men Qytaı ınvestorlaryna tıesili. Bul qatynas sońǵy onjyldyqta ózgergen joq», - dedi Jeńis Qasymbek Úkimet úıinde ótken baspasóz máslıhatynda.

1 tamyzdaǵy jaǵdaı boıynsha, Qazaqstanda 20 myń sheteldik kompanııa fılıaldary jáne birlesken kompanııalar jumys istep jatyr.

«Onyń 35% Qazaqstan-Reseı kompanııalary, 10% - Túrkııa kompanııalary, 5,7% - Ózbekstan, 5,6% - Qytaı, 3,1% - Germanııa jáne basqa da sheteldik kompanııalar jumys isteýde. Bul – álemdik tájirıbe. Qazaqstannyń da kompanııalary shet memleketterde qarqyndy jumys istep jatyr», - dedi Premer-Mınıstr orynbasary.