Qazaqstan ınvestıtsııalardy qoldaý maqsatynda 20 elmen kelisim ázirleýde - J. Qasymbek
ASTANA. QazAqparat - Qazaqstan ınvestıtsııalardy qoldaý maqsatynda 20 elmen kelisim ázirleýde. Bul týraly Parlament Senaty Ekonomıkalyq saıasat, óńirlik damý jáne kásipkerlik komıtetiniń keńeıtilgen otyrysynda Investıtsııalar jáne damý vıtse-mınıstri Jeńis Qasymbek málim etti.
Komıtet otyrysynda «Qazaqstan Respýblıkasynyń Úkimeti men Makedonııa Respýblıkasynyń Úkimeti arasyndaǵy ınvestıtsııalardy kótermeleý jáne ózara qorǵaý týraly kelisimdi ratıfıkatsııalaý týraly» zań jobasy talqylanǵan bolatyn.
Vıtse-mınıstrdiń aıtýynsha, sheteldik ınvestorlar úshin qolaıly jaǵdaılar jasaý Qazaqstannyń ınvestıtsııalyq saıasatynyń basty maqsattarynyń biri bolyp tabylady. Sonymen qatar, álemdik tájirıbede tyǵyz ekonomıkalyq yntymaqtastyq eki halyqaralyq kelisimmen ólshenedi, onyń birinshisi - ınvestıtsııany ózara qorǵaý bolsa, ekinshisi - qosarlanǵan salyqty boldyrmaý.
«Búgingi kúni Qazaqtan osyndaı 48 kelisimge qol qoıǵan. Aldaǵy josparlarǵa sáıkes, biz qosymsha 20 elmen dál osyndaı ınvestıtsııalar úshin jaǵymdy jaǵdaı jasaıtyn kelisimderdi ázirlep jatyrmyz. Bul qujattar memleketter arasyndaǵy qarym qatynasty odan ári damytýǵa óz septigin tıgizedi», - dedi Investıtsııalar jáne damý vıtse-mınıstri J. Qasymbek.
Onyń aıtýynsha, Makedonııamen tyǵyz ınvestıtsııalyq qarym-qatynasty ornatý úshin jasalǵan kelisimniń kúshine enýi ózara ınvestıtsııa tartý úshin mańyzdy quqyqtyq negiz qalyptastyrady.
«Statıstıka komıtetiniń málimetterine qaraǵanda, Qazaqstan men Makedonııa arasyndaǵy taýar aınalymy 2015 jyly 2 mln. dollardy qurady, onyń ishinde eksport - 0,1 mln. dollar, ımport - 1,9 mln. dollar bolyp otyr. 2015 jyldyń 1 jeltoqsanyndaǵy jaǵdaıǵa sáıkes, Qazaqstanda makedonııalyq tarap qatysatyn 8 zańdy tulǵa, fılıaldar men ókildikter tirkelgen», - dedi J.Qasymbek.
