Qazaqstan Interpol arqyly izdeý salǵan adam Grýzııada qolǵa tústi
ASTANA. KAZINFORM - Qazaqstannyń Іshki ister mınıstrligi Interpoldyń Ulttyq ortalyq bıýrosy arqyly suraý salǵan halyqaralyq izdeýde júrgen adam Grýzııanyń Rýstavı qalasynda ustaldy, dep habarlaıdy QR ІІM baspasóz qyzmeti.
Ol QR Qylmystyq kodeksiniń 367-baby 2-bóliginde kózdelgen qylmysty – laýazymdy tulǵaǵa para berý áreketin jasaǵany úshin aıyptalyp otyr.
Tergeý dereginshe, kúdikti 2019 jyly qylmystyq jaýapkershilikten jaltarý maqsatynda quqyq qorǵaý organynyń qyzmetkerine 400 AQSh dollary kóleminde para bergen.
Buǵan deıin júrgizilgen tekserý barysynda kúdiktige tıesili massaj salonynyń atymen jezókshelik qyzmet kórsetilgeni anyqtalǵan. Qazirgi ýaqytta ustalǵan azamat Grýzııa aýmaǵynda qamaýǵa alyndy.
Osyǵan deıin 2025 jylǵy tamyzda Qazaqstan Respýblıkasynyń 12 turǵyny terrorıstik jáne ekstremıstik qylmystar jasaǵany úshin sottalǵany týraly jazdyq.