Qytaı asteroıdqa qarsy qorǵanys júıesin qurmaq

ASTANA. KAZINFORM — 2024 YR4 dep atalatyn asteroıd 8 jyldan keıin Jerge soqtyǵysýy múmkin. NASA-nyń boljamyna baılanysty qytaılyq astronomdar naqty qaýip deńgeıin anyqtaý úshin baqylaý jumystaryn jalǵastyrýdyń qajettiligin málimdedi.

Lianhe Zaobao basylymynyń habarlaýynsha, Qytaı Jerge jaqyn asteroıdtarǵa qarsy qorǵanys júıesin qurýǵa kirisip ketken.

Qytaılyq astronomdar atalǵan boljamǵa bola dúrligýge esh negiz joq ekenin aıtady. Olardyń pikirinshe, qazirgi basty mindet — asteroıdtyń orbıtasyn muqııat baqylaý jáne naqty traektorııasyn esepteý. Eger onyń bolashaqta adamzatqa shynymen qaýip tóndiretini dáleldense, qarastyrylyp otyrǵan yqtımal qorǵanys strategııalary da joq emes. Bul baǵytta Qytaı «Jerge jaqyn asteroıdtarǵa qarsy qorǵanys júıesin» qurýdy qolǵa aldy. Sondaı-aq álem ǵalymdary da «planetarlyq qorǵanys» máselesi boıynsha birlesip jumys isteıdi. 

Basylymnyń jazýynsha, AQSh Ulttyq aeronavtıka jáne ǵarysh ákimshiligi (NASA) jýyqta 2024 YR4 asteroıdynyń 2032 jyly Jerge soqtyǵysý yqtımaldyǵy 2% ekenin málimdegen. Aspan denesi alǵash ret 2023 jyldyń 27 jeltoqsanynda anyqtalǵan bolatyn.

Qazirgi ýaqytta bul asteroıd 48 mıllıon shaqyrym qashyqtyqtan Jerge qaraı ushyp keledi. Asteroıdtyń Jerge soqtyǵysý yqtımaldyǵy óte tómen bolsa da, ǵalymdar ony báribir muqııat baqylap, qosymsha derekter alýǵa tyrysyp otyr.

Ǵalymdardyń esepteýinshe, bul asteroıdtyń dıametri 40-90 metr aralyǵynda. Demek, ol «Janalǵysh» deńgeıindegi asteroıdtar qataryna jatpaıdy.

«Janalǵysh» deńgeıindegi asteroıdtar — dıametri 1 shaqyrym nemese odan da úlken ǵarysh tastary, olar Jerdegi tirshilikke orny tolmas apat ákelýi múmkin.