Qazaqstan ınternet trafıkti Qytaı men Reseıden ǵana emes, Eýropadan tartýy múmkin

Eýropalyq Odaq Qazaqstandaǵy ınternet kózderin ártaraptandyrýǵa atsalyspaqshy. Bul týraly Eýropalyq Odaqtyń Qazaqstandaǵy Ókildigi yntymaqtastyq bóliminiń basshysy Iohannes Baýr Ortalyq Azııanyń Eýrazııalyq qory uıymdastyrǵan jıynda málim etti, dep habarlaıdy Kazinform.

«Qazaqstanǵa qazir ınternet trafık Reseıden jáne Qytaıdan keledi. Bizdiń joba Qazaqstanǵa eýropalyq spýtnık baılanysyn paıdalaný múmkindigin usynǵysy keledi. Bul — eýropalyq SES kompanııasynyń ónimi. Mysaly, Starlink jerdi tómen orbıtamen aınalsa, SES spýtnıkteri orta orbıtamen aınalady. Orta orbıtadaǵy spýtnıkter búkil Qazaqstandy qamtı alady. Artyqshylyǵy sonda. Tipti búkil Ortalyq Azııany qamtıdy», — deıdi Iohannes Baýr.

Onyń sózinshe, atalmysh jobany Eýrokomıssııa maquldap otyr.

«Bul jobany biz 2024 jyly ótetin „Ortalyq Azııa — Eýropalyq Odaq“ sammıtinde tanystyrǵymyz keledi. Jobanyń birinshi kezeginde Eýropalyq Odaq 20 mln eýro bóledi. Biraq bul — búkil Ortalyq Azııaǵa bólingen soma. Ol qarajattyń úlken bóligi Qazaqstan, Qyrǵyzstan men Ózbekstan elderine baǵyttalady dep oılaımyn. Ekinshi kezekte qaı elge naqty qansha bólinetini ázirge belgisiz. Biraq bul Eýropa ınvestıtsııalyq bankiniń úlken kólemdegi nesıesi bolady», — dedi Eýropalyq Odaqtyń Qazaqstandaǵy Ókildigi yntymaqtastyq bóliminiń basshysy Iohannes Baýr.