Qazaqstan ınfraqurylymdy jańǵyrtý arqyly ónerkásip kooperatsııasyn damytpaq
ASTANA. KAZINFORM — Qazaqstan Respýblıkasynyń Premer-mınıstri Oljas Bektenov Mınsk qalasynda «INNOPROM. Belarýs» halyqaralyq ónerkásiptik kórmesine qatysty. Úkimet jetekshisi kórmeniń ekspozıtsııasymen, sondaı-aq usynylǵan ónerkásiptik jáne tehnologııalyq sheshimdermen tanysyp, plenarlyq otyrysta sóz sóıledi. Bul týraly Úkimet málim etti.
Oljas Bektenov álemdik ekonomıkanyń tereń transformatsııasy jáne jahandyq óndiristik tizbekterdiń jańarýy jaǵdaıynda elderdiń quzyretterdi, ınvestıtsııalar men tehnologııalardy biriktirý qabileti aıryqsha mánge ıe ekenin atap ótti.
Sondaı-aq Prezıdent Qasym-Jomart Toqaev aıqyndaǵan Qýatty ári Ozyq Qazaqstandy qurý baǵyty aıasynda el ekonomıkasy shıkizattyq modelden qosylǵan quny joǵary óńdeý óndiristerin damytýǵa júıeli túrde bet buryp kele jatqanyna basa nazar aýdaryldy. Búginde olardyń el ónerkásibindegi úlesi 46,7%-ǵa jetti.
Premer-mınıstr óz sózinde Memleket basshysynyń bastamasymen iske qosylǵan jáne ınfraqurylymdy jańartýǵa baǵyttalǵan aýqymdy qurylys baǵdarlamasyn júzege asyrý máselesine basa nazar aýdaryp, Qazaqstannyń birlesken óndirister qurýǵa jáne jabdyqtar shyǵarýdy lokalızatsııalaýǵa múddeli ekenin atap ótti.
— Qazaqstan Prezıdentiniń bastamasy boıynsha elimizdiń ınfraqurylymyn keń aýqymda jańartý baǵdarlamasy júzege asyrylýda. Úkimettiń aldyna turaqty ekonomıkalyq ósim men azamattardyń ómir súrý sapasyn arttyrý úshin qajetti ınfraqurylymdardy ozyq qarqynmen damytý mindeti qoıyldy. 2029 jylǵa deıingi Ulttyq ınfraqurylymdyq jospar aıasynda $90 mlrd-tan astam somaǵa jobalardy júzege asyrý kózdelgen. Naqty aıtqanda biz energetıka, kólik, turǵyn úı-kommýnaldyq sharýashylyq jáne áleýmettik nysandardy qamtıtyn úlken qurylys baǵdarlamasy týraly sóz etip otyrmyz. Bul ónerkásip kooperatsııasyn damytýǵa, jańa kásiporyndar qurýǵa jáne turaqty óndiristik tizbekterdi qalyptastyrýǵa eleýli serpin beredi, — dep atap ótti Oljas Bektenov.
Tsıfrlandyrý kontekstinde búginde Qazaqstanda tehnologııalyq ınfraqurylym damyp, ónerkásiptik transformatsııa úshin tolyqqandy ekojúıe qalyptasyp jatqany atap ótildi. IT-qyzmetter eksportynyń kólemi qazirdiń ózinde $1,1 mlrd-tan asty. Alem.Cloud jáne AL Farabium sýperkompıýterlik klasterleriniń, Halyqaralyq Alem.ai jasandy ıntellekt ortalyǵynyń bolýy, sondaı-aq «DÓO alqaby» jobasyn salýdyń belsendi kezeńge ótýi ónerkásiptik jasandy ıntellektini, kásiporyndardyń tsıfrlyq syńaryn engizýge jáne robottandyrýǵa myqty negiz qalyptastyrady. Budan bólek, Qazaqstannyń kólik-logıstıkalyq áleýetin dáıekti damytý jáne negizgi tranzıttik dálizderdi jańǵyrtý júrgizilýde, bul jetkizý merzimderin qysqartýdy qamtamasyz etedi jáne búkil Eýrazııanyń ónerkásiptik kásiporyndary úshin jetkizilimderdiń ekonomıkalyq tıimdiligin arttyrady.
Plenarlyq sessııaǵa Belarýs Premer-mınıstri Aleksandr Týrchın, Reseı Premer-mınıstri Mıhaıl Mıshýstın, Ózbekstan Premer-mınıstri Abdýlla Arıpov, Qyrǵyzstan Mınıstrler kabıneti tóraǵasy – Prezıdent Ákimshiliginiń basshysy Adylbek Qasymalıev, sondaı-aq Nıkaragýa ókili qatysty.
Buǵan deıin Qazaqstannyń ınnovatsııalyq ónimderi halyqaralyq kórmede tanystyrylǵanyn jazdyq.
