Qazaqstan taý shańǵysy týrızmin álemdik standarttarǵa saı damytýǵa nıetti
ASTANA. KAZINFORM – Premer-mınıstr Oljas Bektenov PGI Management kompanııasynyń prezıdenti Djoan Vıladomatpen taý shańǵysy týrızmin damytýdaǵy yntymaqtastyq máseleleri boıynsha kezdesý ótkizdi. Jıynda Almaty klasterine kóńil bólindi. Bul týraly Úkimettiń baspasóz qyzmeti habarlady.
Týrızm salasynyń jahandyq úrdisteri jáne onyń elder ekonomıkasynyń ósýine qosqan úlesi talqylandy. Taý shańǵysy baǵyty taýly aýdandar men jalpy elimizdiń áleýmettik-ekonomıkalyq damýynyń mańyzdy quraly ekeni aıtyldy.
Djoan Vıladomat týrızmge nazar aýdarýdy eskere otyryp, birqatar eldiń ekonomıka qurylymdaryn transformatsııalaý boıynsha jobalardy iske asyrý nátıjelerimen bólisti. Búgingi tańda kompanııada 120-dan astam joba bar, oǵan Davos jáne Sent-Morıts (Shveıtsarııa), Kýrshevel (Frantsııa), Ishgl jáne Tırol (Aýstrııa), Veıl jáne Aspen (AQSh), Ýıstler-Blekkomb (Kanada) sııaqty qysqy týrıstik brendter, sondaı-aq ótken jyly kelýshiler sany 9,6 mln adamdy quraǵan, 80 myń halqy bar Andorra kýrorttary kiredi. 60 jyldan astam ýaqyt boıy kompanııa taý shańǵysy keshenderin damytýda álemdik kóshbasshyǵa aınaldy.
Taraptar Almaty taý klasterin birlesip damytý keleshegin qarastyrdy. Búgingi tańda týrıstik aǵyn jylyna 2 mln adamdy quraıdy, jalpy maýsymdyq 2 myń jumys orny ashyldy. Jalpy uzyndyǵy 41 shaqyrym jáne 16 kótergish trassadan turatyn qoldanystaǵy ınfraqurylym kúnine 6 myń adamdy qamtamasyz etýge múmkindik beredi. Bul rette otandyq jáne sheteldik týrıster tarapynan suranystyń artýy maýsymdyq týrıstik destınatsııa retinde taý shańǵysy týrızmin damytýdyń memlekettik strategııasyn odan ári jetildirýdi talap etedi. Taldaý nátıjesine sáıkes, trassalar uzyndyǵyn 227 shaqyrymǵa, kótergishter sanyn 58-ge deıin arttyrý arqyly klaster ınfraqurylymyn damytý aǵymdaǵy ótkizý qabiletin 5,6 esege, kúnine 34 myń adamǵa deıin jetkizýge, 10 myń tikeleı jumys ornyn ashýǵa múmkindik beredi. Osylaısha, 2029 jylǵa qaraı Almaty taý klasteri jylyna 7,5 mln-ǵa deıin týrıst qabyldaı alady. Sonymen qatar enshiles jáne servıstik ekonomıkanyń damýyna turaqty áser kútilýde.
Inklıýzııa da mańyzdy sala retinde ataldy. Infraqurylymdy jańǵyrtý balalardyń qysqy sport túrlerin meńgerýi jáne otbasylyq bos ýaqytyn uıymdastyrý úshin bilim berý baǵdarlamalaryn keńinen damytýǵa múmkindik beredi.
Premer-mınıstr qazirgi jahandyq ekonomıkalyq jaǵdaıda ártaraptandyrýǵa basymdyq berilgenin atap ótti. Týrızm óńdeý ónerkásibi jáne tsıfrlandyrý, kólik jáne logıstıka sııaqty salalarmen qatar ekonomıkalyq ósýdiń jańa núktesi bolýǵa tıis.
Kezdesý qorytyndysy boıynsha qatysýshylar halyqaralyq standarttarǵa beıimdelgen ınfraqurylymdy jańǵyrtý boıynsha birlesken jumys jasaýǵa nıet bildirdi.
Aıta ketelik Qazaqstan men Benın arasynda birqatar memorandýmǵa qol qoıyldy.