Qazaqstan Indonezııaǵa et, et konsevileri men astyq eksportynyń kólemin arttyrmaq

Otyrysqa eki eldiń memlekettik organdarynyń, «Atameken» UKP-nyń, dıplomatııalyq mıssııalar men bıznes ókilderi qatysty. Taraptar saýda, ınvestıtsııa, kólik-logıstıka, energetıka, tsıfrlandyrý, aýyl sharýashylyǵy, standarttaý jáne týrızm máselelerin talqylady.

- Indonezııa — Qazaqstannyń Ońtústik-Shyǵys Azııadaǵy negizgi ekonomıkalyq seriktesteriniń biri. Biz ekijaqty qatynastardy jańa sapaly deńgeıge kóterýge múddelimiz. Eki el arasynda saýda-ekonomıkalyq, mádenı jáne basqa da salalardy qamtıtyn 26 kelisim bar, — dedi Serik Jumanǵarın.

Vıtse-premer ótken jyldyń jeltoqsan aıynda qol qoıylǵan EAEO men Indonezııa arasyndaǵy erkin saýda týraly kelisimniń mańyzyn da erekshe atap ótti.

- Bul — EAEO men ASEAN-nyń eń iri ekonomıkasy arasyndaǵy strategııalyq kópir. Ol eksport pen ónerkásiptik kooperatsııany damytýǵa jańa múmkindik ashady, — dedi Serik Jumanǵarın.

Qazaqstan ózara jetkiziletin taýarlar nomenklatýrasyn keńeıtýdi jáne qoldanystaǵy saýda baǵyttaryn jandandyrýdy usyndy.

Qazaqstan tarapynyń málimetinshe, 20 taýarlyq pozıtsııa boıynsha eksporttyq áleýet $60 mln-nan asady. Perspektıvaly baǵyttardyń qatarynda Indonezııanyń bolat quıý jáne avtomobıl ónerkásibine qazaqstandyq ferroqorytpalardy jetkizý, sondaı-aq astyq eksportyn ulǵaıtý ataldy.

-Bıyl Indonezııanyń bıdaı ımportyna degen suranysy 13 mln tonnaǵa deıin ósýi múmkin. Qazaqstan Indonezııanyń un óndirý ónerkásibine joǵary sapaly, jelimtegi joǵary bıdaıdy turaqty túrde jetkizýge daıyn, — dedi Serik Jumanǵarın.

Taraptar halal ónimderi salasyndaǵy yntymaqtastyqqa da erekshe nazar aýdardy. Qazaqstan Indonezııa naryǵyna sıyr eti, qoı eti jáne et konservilerin jetkizý kólemin arttyrýǵa daıyn ekenin málimdedi. Eksporttyq áleýettiń mysaly retinde Serik Jumanǵarın «Qaıyp ata» JShS jobasyn tanystyrdy.

- Búginde biz Ortalyq Azııadaǵy sıyr etin jetkizýshi jetekshi elderdiń birimiz. Eki jyl buryn avstralııalyq áriptesterdiń tájirıbesin zerttep, ony Qazaqstanda engizdik. Nátıjesinde elimizde 50 myń bas malǵa arnalǵan tolyq tsıkldi eń iri klaster quryldy, — dedi ol.

Indonezııa tarapy azyq-túlik qaýipsizdigi, halal ındýstrııasy jáne energetıka salalaryndaǵy yntymaqtastyqty keńeıtýge qyzyǵýshylyq tanytatynyn rastady.

- Biz ınvestıtsııa, energetıka, tsıfrlyq transformatsııa, týrızm, standarttaý, densaýlyq saqtaý salalary men bıznes qaýymdastyqtary arasyndaǵy ózara is-qımyl baǵyttarynda birqatar ekijaqty bastamalar boıynsha ilgerileý baryn atap ótkimiz keledi, - dep atap ótti Indonezııanyń Ekonomıkalyq ister jónindegi úılestirýshi mınıstri Aırlangga Hartarto.

Sondaı-aq, Aırlangga Hartarto Indonezııa men EAEO arasyndaǵy erkin saýda týraly kelisimdi ratıfıkatsııalaý protsesin jedeldetýdi qoldap, Indonezııa–EAEO Іskerlik keńesin qurýdy usyndy. Standarttaý salasynda taraptar Qazaqstannyń standarttaý jáne metrologııa ınstıtýty men Indonezııanyń Ulttyq standarttaý agenttigi arasyndaǵy memorandýmdy ázirleý máselesin sóz etti.

Ortalyq jáne Ońtústik-Shyǵys Azııa arasyndaǵy kólik baılanysyn damytýǵa da erekshe nazar aýdaryldy. Taraptar mýltımodaldy kólik baǵyttaryn jáne Lıanıýngan dálizi arqyly konteınerlik temirjol qatynasynyń pılottyq jobasyn talqylady. Týrıstik qatynas ta artyp keledi.

Qazaqstannan Indonezııaǵa barǵan týrıster sany 2023 jylǵy 8,2 myń adamnan 2025 jyly 24,4 myń adamǵa deıin ósti. Otyrys qorytyndysynda Qazaqstan men Indonezııanyń ekonomıkalyq yntymaqtastyq jónindegi úkimetaralyq komıssııasynyń ekinshi otyrysynyń hattamasyna qol qoıyldy.

Jıynda Qazaqstan delegatsııasyn Premer-mınıstrdiń orynbasary – ulttyq ekonomıka mınıstri Serik Jumanǵarın, Indonezııa delegatsııasyn Indonezııanyń Ekonomıkalyq ister jónindegi úılestirýshi mınıstri Aırlangga Hartarto basqardy.

Osyǵan deıin Sankt-Peterbýrg qalasynda ótken Joǵary Eýrazııalyq ekonomıkalyq keńes aıasynda Eýrazııalyq ekonomıkalyq odaq pen oǵan múshe memleketter, sondaı-aq Indonezııa Respýblıkasy arasynda Erkin saýda týraly kelisimge qol qoıylǵany týraly jazdyq.