Qazaqstan-Indonezııa dıplomatııalyq qarym-qatynasyna 30 jyl toldy
Astanadaǵy Qalıbek Qýanyshbaev atyndaǵy qazaq drama teatrynda Qazaqstan men Indonezııanyń arasynda dıplomatııalyq qarym-qatynas ornaýynyń 30 jylyǵy men Indonezııa táýelsizdiginiń 78 jyldyǵyna arnalǵan saltanattty shara ótti, dep habarlaıdy QazAqparat tilshisi.
Shara qonaqtarynyń nazaryna Indonezııa halqynyń mádenıeti, aspazdyq óneri men sándik ǵuryptary usynylyp, eldiń tanymal taýarlary men týrızm salasyndaǵy áleýeti pash etildi.
Saltanatty keshke shaqyrylǵandardyń arasynda eki eldiń dıplomatııalyq baılanystarynyń nyǵaıýyna úles qosyp júrgen úkimet músheleri, bıznes ókilderi, bilim salasyndaǵy mamandar men BAQ ókilderi boldy.
Astana Indonezııanyń jańa astanasy — Nýsantara qalasymen tuńǵysh baýyrlas qala retinde tarıhqa enip otyr. 3 shilde kúni eki tarap osyndaı memorandýmǵa qol qoıǵan. Bul eki eldiń arasyndaǵy 30 jyldyq tarıhy bar dımplomatııalyq qarym-qatynasynyń bir begisi ǵana.
2022 jyly eki el arasyndaǵy taýar aınalymy 700 mln dollarǵa jetken. Bıyl qazaqstandyq úsh kompanııa Nýsantara qalasyna ınvestıtsııa salýdy kózdeıtin memorandýmǵa qol qoıdy.
2023 jyldyń qańtarynan beri Indonezııaǵa týrıst retinde barǵan qazaqstandyqtarǵa bvıza berý rejımi iske qosyldy. Al Qazaqstanǵa osyndaı maqsatpen kelgen ındonezııalyqtarǵa 30 kúnge deıin vızasyz rejım usynylyp otyr.
Indonezııanyń tól jekpe-jegi sanalatyn Penchak sılat jaýyngerlik óneri Qazaqstanda keń taralyp keledi.
Indonezııanyń «Garýda Indonezııa» áýe kompanııasy men «Eır Astana» arasynda Almaty-Inchhon-Balı baǵytyndaǵy reısterdi birlesip ıgerý kelisimi bar.
Qazaqstan Úkimeti men Indonezııa elshiligi Qazaqstan men Indonezııa arasynda tikeleı áýe reısin ashý baǵytynda jumys istep jatyr jáne ony dıplomatııalyq baılanystyń 30 jyldyǵy qarsańynda aıaqtamaqshy.
Ekijaqty baılanystyń ózge de utymdy tustary týraly Indonezııa Elshisi Mohamad Fadjrýl Rahman biraz maǵlumat berdi.
«Búgingi jarqyn keshte men osynda jınalǵan qymbatty qonaqtarymyzben Indonezııanyń Táýelsizdik kúniniń 78 jyldyǵyn jáne Indonezııa men Qazaqstannyń ekijaqty qarym-qatynastarynyń 30 jyldyǵyn toılap jatqanymyzǵa óte qýanyshtymyn.
Men bizdiń qurmetti qonaǵymyz, Qazaqstannyń Ulttyq ekonomıka mınıstri Álibek Qýantyrov myrzanyń búgingi qabyldaýǵa kelgenine zor alǵys bildiremin. Bul Indonezııa men Qazaqstan arasyndaǵy berik ekijaqty qarym-qatynasty kórsetedi.
30 jyl buryn, maýsymnyń shýaqty kúnderinde Indonezııa Respýblıkasy men Qazaqstan Respýblıkasy resmı túrde dıplomatııalyq qatynastar ornatty. Bul Indonezııa 1991 jylǵy 16 jeltoqsanda Qazaqstan Respýblıkasynyń táýelsizdigin jarııalaǵanyn moıyndaǵannan keıingi tyǵyz yntymaqtastyqtyń mańyzdy kezeńi boldy.
2018 jyly mártebeli Qasym-Jomart Toqaev Qazaqstan Senatynyń Tóraǵasy retinde Indonezııaǵa baryp, Prezıdent Djoko Vıdodomen kezdesti. Jahandyq arenada Indonezııa men Qazaqstan ózara qyzyǵýshylyq týdyratyn túrli máseleler boıynsha tyǵyz yntymaqtastyq ornatty. Indonezııa Azııadaǵy ózara is-qımyl jáne senim sharalary keńesindegi baıqaýshy el retinde 2023-2024 jyldarǵa arnalǵan qazaqstandyq tóraǵalyqtyń basymdyqtaryn qoldaıdy», - dedi Elshi.
Sondaı-aq, ol qazaqstandyq Sergek kompanııasy Nýsantara qalasynyń kólik júıesine óz tehnologııasyn engizetinin atap ótti.
«Kalımantan aralyndaǵy Nýsantara 2024 jyldyń tamyzynda Indonezııanyń jańa astanasy retinde resmı túrde ashylýǵa daıyn bolady», - dedi Mohamad Fadjrýl Rahman.
Indonezııa men Qazaqstan munaı, gaz jáne paıdaly qazbalar sektoryndaǵy yntymaqtastyq jónindegi ózara túsinistik týraly memorandým aıasynda energetıka sektoryndaǵy yntymaqtastyqty nyǵaıtýǵa yntaly. Qazir Indonezııa men Eýrazııalyq ekonomıkalyq odaq arasyndaǵy erkin saýda aımaǵy týraly kelissózder júrip jatyr.
«Osy jyldyń basynda Indonezııa úkimeti Qazaqstandy kelgen kezde vıza alatyn elder tizimine qosty. Al 15 mamyrda Indonezııa men Qazaqstan Seýl arqyly ótetin Balı-Almaty qalaaralyq reısi iske qosyldy. Endigi mindet – Indonezııa men Qazaqstan arasynda tikeleı áýe qatynasyn ornatý. Qazaqstan Kólik mınıstrliginiń jáne eki eldiń barlyq múddeli taraptarynyń qoldaýymen biz bul armanymyzdy taıaý bolashaqta júzege asyramyz dep senemiz», - deıdi Indonezııa Elshisi.
