Qazaqstan Inditex tobynyń elimizdegi qyzmetin keńeıtýdi josparlap otyr
ASTANA. KAZINFORM – Prezıdent Inditex Group bas dırektorynyń orynbasary Santıago Martınes-Lahe Sobredony qabyldady, dep habarlaıdy Aqordanyń baspasóz qyzmeti.
Qasym-Jomart Toqaev Ispanııanyń Inditex Group kompanııasy bas dırektorynyń orynbasary – syrtqy baılanystar jónindegi dırektory Martınes-Lahe Sobredomen yntymaqtastyq perspektıvasyn talqylady.
Memleket basshysy ekonomıkalyq yqpaldastyq qazaq-ıspan qarym-qatynasynyń negizgi tirekteriniń biri bolyp qala beretinin, al Qazaqstanda barlyǵy 60-qa jýyq ıspandyq kompanııa jumys isteıtinin aıtty.
Prezıdent álemdegi jetekshi rıteıler sanatyna enetin Inditex tobynyń elimizdegi qyzmetin keńeıtý jáne Qazaqstandy Ortalyq Azııanyń basty kólik-logıstıka torabyna aınaldyrý jónindegi josparyn quptady.
Sonymen qatar Memleket basshysy kompanııanyń ýaqyt óte kele elimizde logıstıka aıasynan shyǵyp, toqyma salasynda qýatty óndiris ornyn qura alatynyna senimdi ekenin jetkizdi.
Santıago Martınes-Lahe Sobredo Qazaqstanda kásipkerlik pen ınvestıtsııaǵa qolaıly jaǵdaı jasalǵanyn atap ótip, bıznesti órkendetý josparymen bólisti.
Qazirgi ýaqytta Inditex quramyna Zara, Pull&Bear, Massimo Dutti, Bershka sııaqty otandyq saýda jelilerinde keńinen usynylatyn belgili brendter kiredi. Kompanııa Almaty men Qaraǵandy áýejaılarynyń bazasynda óńirlik logıstıkalyq hab qalyptastyryp jatyr.
Osyǵan deıin Groupe ADP kompanııasy basshysy Fılıpp Paskalmen kezdesip, Almaty áýejaıyn damytýdyń uzaqmerzimdi perspektıvasyna nazar aýdardy.
