Qazaqstan ımporttyq baj salyǵy boıynsha kelissózderge AQSh-qa delegatsııa jiberedi
ASTANA. KAZINFORM — Qazaqstan ımporttyq baj salyǵyna qatysty konsýltatsııalar boıynsha AQSh-qa ókilderin jiberedi. Bul týraly Saýda jáne ıntegratsııa vıtse-mınıstri Janel Kýshýkova málim etti.
— Qazir bekitilgen tarıfterge (AQSh-tyń bastamasy) qatysty bolǵan jaǵdaıdy eskere otyryp, barlyq el konsýltatsııalar ótkizýge múddeli. Biz de osy úrdisten tys qalmaıtynmyz anyq. Osy máseleni Úkimette pysyqtap, konsýltatsııaǵa daıyndalyp jatyrmyz… Kelissózder AQSh-ta ótedi, — dedi vıtse-mınıstr Senattyń jalpy otyrysynan keıin tilshiler suraǵyna jaýap bere otyryp.
Budan buryn habarlanǵandaı, AQSh Prezıdenti Donald Tramp Qazaqstandy qosa alǵanda 185 elden keletin taýarǵa jańa baj salyǵy engiziletinin málimdedi. Osyǵan oraı qarjy sarapshylary Andreı Chebotarev pen Rasýl Rysmambetov elimizdiń ekonomıkasyna onyń qandaı saldary bolýy múmkin ekenine qatysty oıyn aıtty.
Jaqynda Premer-mınıstrdiń orynbasary — Ulttyq ekonomıka mınıstri Serik Jumanǵarın AQSh-tyń Qazaqstan eksportyna engizgen baj mólsherlemesi týraly pikir bildirdi.
Eske salsaq, osyǵan deıin Donald Tramptyń Qytaıǵa baj salyǵyn 145 paıyzǵa deıin kótergeni týraly jazdyq.
Sonymen qatar AQSh ákimshiligi smartfon, kompıýter jáne basqa da elektronıka taýarlaryn ózara kedendik baj salyǵynan ýaqytsha bosatyp, olarǵa bólek salalyq tarıf engizýdi josparlap otyr.