Qazaqstan ımport taýarlaryn azaıtý úshin jeke shıkizattyq bazany damytady
ASTANA. QazAqparat - QR Indýstrııa jáne ınfraqurylymdyq damý mınıstri Roman Sklıar Úkimet bekitken jeńil jáne jıhaz ónerkásibin, qurylys materıaldaryn damytýdyń Jol kartasynyń maqsaty men mindetterin atady, dep habarlaıdy QazAqparat tilshisi.
«Eń aldymen - shıkizatpen qamtamasyz etý kerek. Atalmysh máseleni sheshý úshin jeke shıkizattyq bazany damytý boıynsha sharalar qarastyrylǵan. Joǵary túsimdi ónimdi óndirýde onyń mańyzy zor. Jeńil ónerkásipte bul baǵytta maqta-talshyqty, terini qaıta óńdeýge, jasandy jáne sıntetıkalyq materıaldar óndirisin jetildirýge mán beriledi. Qurylys materıaldaryna qatysty eldiń shıkizattyq áleýetine taldaý júrgiziledi», - deıdi Roman Sklıar.
Mınıstrdiń aıtýyna qaraǵanda, ishki naryqty qorǵaý úshin kedendik ákimshilik pen tehnıkalyq retteý quraldary jetildirilmek.
«Sapasyz ónimderge baqylaý kúsheıtilip, qaýipsiz emes dep tanylǵan ónimderdi joıý, tárkileý erejeleri jetildiriledi. Sonymen birge, taýarlar men qyzmetterdiń sapasyn arttyrýǵa baǵyttalǵan ulttyq standarttar ázirlendi. Ulttyq standarttardy keń aýqymda qoldaný naryqtaǵy ónimderdiń qaýipsizdigi men básekege qabilettiligin arttyrýǵa múmkindik beredi», - deıdi ol.
Іshki naryqta otandyq ónimderdiń úlesin arttyryp, halyqqa ol taýarlardyń qoljetimdiligin arttyrý úshin otandyq taýarlardyń saýda jelilerinde usynylýyn kúsheıtý sharalary qolǵa alynady.
«Otandyq ónimderdiń ótimdiligin arttyryp, jumys istep turǵan kásiporyndar tolyqqandy jumys isteýi úshin jyl saıyn jergilikti (qazaqstandyq) qamtý úlesin 20 paıyzdyq pýnktke kóterý kózdelgen. Jalǵan taýar óndirýshilerge jol bermeý maqsatynda tasymaldaýshy óziniń óndiristik qýatyn Indýstrııalyq sertıfıkatpen rastaýy kerek», - deıdi Roman Sklıar.
Eske sala ketsek, Memleket basshysynyń tapsyrmasymen halyqqa kerekti qarapaıym taýarlardy óndirý úshin 600 mlrd teńge bólingeli otyr. Roman Sklıar buǵan deıin osy maqsatta bólinetin sýbsıdııa sharttaryn ataǵan bolatyn.
