Qazaqstan IKAO-nyń Áýe kóligi jónindegi jetinshi dúnıejúzilik konferentsııasyna qatysyp jatyr

ASTANA. KAZINFORM — Kanada, Monreal qalasynda Halyqaralyq azamattyq avıatsııa uıymynyń (IKAO) Áýe kóligi jónindegi jetinshi dúnıejúzilik konferentsııasy (ATConf/7) óz jumysyn bastady. Konferentsııa halyqaralyq áýe kóligin damytýdyń negizgi máseleleri men perspektıvalaryn talqylaýǵa arnalǵan. Bul týraly Kólik mınıstrligi habarlady.

Qazaqstan IKAO-nyń Áýe kóligi jónindegi jetinshi dúnıejúzilik konferentsııasyna qatysýda
Foto: Kólik mınıstrligi

Dúnıejúzilik konferentsııaǵa quramyna 193 el kiretin IKAO uıymynyń múshe-memleketteriniń ókilderi, sondaı-aq Halyqaralyq áýe kóligi qaýymdastyǵy (IATA), Halyqaralyq áýejaılar keńesi (ACI World), Aeroǵarysh ónerkásibi qaýymdastyqtarynyń halyqaralyq úılestirý keńesi (ICCAIA) sııaqty halyqaralyq jáne óńirlik uıymdardyń ókilderi qatysyp jatyr.

Konferentsııanyń ashylý saltanatynda IKAO Keńesiniń Prezıdenti Toshııýkı Onýma, BUU Týrızm uıymynyń Bas hatshysy Shaıha Ál-Nýaısjáne Kanadanyń Kólik mınıstri Stıven Makkınnon sóz sóıledi.

Qazaqstan IKAO-nyń Áýe kóligi jónindegi jetinshi dúnıejúzilik konferentsııasyna qatysýda
Foto: Kólik mınıstrligi

Óziniń quttyqtaý sózinde Toshııýkı Onýma avıatsııa salasy halyqaralyq yntymaqtastyqqa asa táýeldi salalardyń biri ekenin erekshe atap ótti.

– Halyqaralyq árbir reıs 1944 jyly Halyqaralyq azamattyq avıatsııa týraly konventsııamen qalanǵan standarttaý men ózara senim qaǵıdattaryna negizdeledi. IKAO júıesi ózgerip jatqan tehnologııalarǵa, damyp kele jatqan naryqtarǵa jáne jahandyq aýqymdaǵy kúrdeli paıdalaný talaptaryna beıimdelý qabiletin aldaǵy ýaqytta da saqtaýy tıis, – dedi IKAO Keńesiniń Prezıdenti.

Konferentsııanyń ashylýynda IKAO Bas hatshysy Hýan Karlos Salasar da tanystyrylym jasady.

Qazaqstan Respýblıkasy delegatsııasyn QR Kólik vıtse-mınıstri Talǵat Lastaev bastap bardy. Delegatsııa quramyna QR Kólik mınıstrligi Azamattyq avıatsııa komıtetiniń tóraǵasy Saltanat Tompıeva, Qazaqstan Respýblıkasynyń IKAO janyndaǵy Turaqty ókili Tımýr Tlegenov, QR Kólik mınıstrliginiń ókilderi, sondaı-aq eldiń avıatsııa salasynyń ókilderi kirdi.

Atalǵan konferentsııa ATConf/6 (2013 jylǵy naýryz) konferentsııasynan keıin 13 jyl ótken soń alǵash ret ótkizilip otyr. Osylaısha, IKAO-ǵa múshe memleketter men avıatsııa salasynyń ókilderine álemdik avıatsııada ótken kezeńde oryn alǵan aýqymdy ózgeristerdi eskere otyryp, halyqaralyq áýe kóligin damytýdyń negizgi baǵyttaryn jahandyq deńgeıde qaıta talqylaýǵa múmkindik berilip otyr.

Qazaqstan IKAO-nyń Áýe kóligi jónindegi jetinshi dúnıejúzilik konferentsııasyna qatysýda
Foto: Kólik mınıstrligi

Konferentsııa aıasynda qatysýshylar áýe kóligin yryqtandyrý, avıatsııa salasynyń básekege qabilettiligin arttyrý, halyqaralyq marshrýttyq jelini damytý, tsıfrlandyrý, ınnovatsııalyq sheshimderdi engizý, sondaı-aq azamattyq avıatsııanyń ornyqty damýyn qamtamasyz etý máselelerin qarastyrady.

Konferentsııa baǵdarlamasy aıasynda «Avıatsııa salasynyń qazirgi jaı-kúıi: ózgeristerge beıimdelý jáne 2050 jylǵa daıyndyq deńgeıin baǵalaý» taqyrybyndaǵy joǵary deńgeıdegi pikirtalas, «IKAO-nyń uzaq merzimdi strategııalyq josparyndaǵy áýe kóligi: 2050 jylǵa deıin avıatsııany damytýdy jedeldetý» atty sessııa, avıatsııalyq ınfraqurylymdy damytý men jańǵyrtýǵa ınvestıtsııalar tartý, normatıvtik-quqyqtyq jáne ınstıtýtsıonaldyq bazany nyǵaıtý, halyqaralyq áýe kóligin retteýdiń ekonomıkalyq jáne normatıvtik-quqyqtyq tetikterin júıeli jetildirý arqyly áýe qatynasynyń qoljetimdiligimen baılanystylyǵyn arttyrý, sondaı-aq avıatsııalyq júıeniń ornyqtylyǵyn qamtamasyz etý maqsatynda tótenshe jaǵdaılarǵa den qoıýdy josparlaý tetikterin jetildirý jáne tutynýshylardyń quqyqtaryn qorǵaý máselelerine arnalǵan paneldik pikirtalastar ótkiziledi.

19 qarashada ashylýy josparlanǵan IKAO Assambleıasynyń kezekten tys sessııasyn ótkizýdiń basty maqsaty – IKAO Keńesiniń quramyn 36-dan 40 memleketke deıin ulǵaıtýǵa baılanysty Keńeske qosymsha tórt múshe memleketti saılaý. Sonymen qatar Assambleıa baǵdarlamasynda Mınıstrlik deklaratsııany qabyldaý kózdelgen.

Qazaqstannyń ATConf/7 konferentsııasy men IKAO Assambleıasynyń 43-sessııasyna qatysýy elimizdiń halyqaralyq yntymaqtastyq qaǵıdattaryna jáne jahandyq avıatsııalyq kún tártibin qalyptastyrýǵa belsendi qatysýǵa beıildiligin rastaıdy.

Qazaqstan delegatsııasy ATConf/7 alańyn ozyq halyqaralyq tájirıbe almasý, ekijaqty kezdesýler ótkizý, ulttyq múddelerdi ilgeriletý, shet memlekettermen jáne halyqaralyq uıymdarmen áriptestik baılanystardy nyǵaıtý, sondaı-aq Qazaqstannyń azamattyq avıatsııasyn odan ári damytý perspektıvalaryn talqylaý maqsatynda paıdalanýdy kózdep otyr.

Konferentsııaǵa qatysý Qazaqstanǵa áýe kóliginiń tıimdi, qaýipsiz, básekege qabiletti jáne ornyqty júıesin qalyptastyrý máseleleri boıynsha halyqaralyq dıalogqa syndarly úles qosýǵa múmkindik beredi.

IKAO Bas hatshysy avıatsııa salasyna jastardy tartýdyń mańyzyn atap ótken edi.