Qazaqstan IKAO Assambleıasynda 33 avıatsııalyq bastamany alǵash ret usyndy
ASTANA. KAZINFORM — IKAO-nyń shtab-páterinde Halyqaralyq azamattyq avıatsııa uıymy Assambleıasynyń 42-sessııasy ótip jatyr. Ol 2025 jylǵy 23 qyrkúıek pen 3 qazan aralyǵynda Monreal qalasynda bolady. Assambleıaǵa 193 múshe-memleketterden 3 myńnan astam delegattar qatysyp jatyr. Bul týraly Kólik mınıstrligi málim etti.
Qazaqstan delegatsııasyn QR KM Azamattyq avıatsııa komıtetiniń tóraǵasy Saltanat Tompıeva men Qazaqstan Respýblıkasynyń Halyqaralyq azamattyq avıatsııa uıymyndaǵy (IKAO) Turaqty ókili Tımýr Tlegenov bastap bardy. Qazaqstannyń IKAO Assambleıasyna qatysýy eldiń saıası jáne ekonomıkalyq múddelerin qorǵaý, sondaı-aq halyqaralyq avıatsııalyq qoǵamdastyqtaǵy rólin jáne mańyzdylyǵyn arttyrý úshin basym mánge ıe.
Assambleıanyń 42-sessııasyn IKAO Keńesiniń Prezıdenti Salvatore Shakkıtano men IKAO Bas hatshysy Hýan Karlos Salasar ashty. Qatysýshylarǵa arnalǵan quttyqtaý sózinde IKAO Keńesiniń Prezıdenti Salvatore Shakkıtano álemdik avıatsııa birlesken sheshimderdi talap etetin jahandyq syn-qaterlerge tap bolyp otyrǵanyn atap ótti.
— Avıatsııa qandaı qıyndyqtar bolsa da, jahandyq turaqty mobıldiliktiń negizi bolýy tıis. Ushý qyzmetterine suranystyń artýy jaǵdaıynda sala qaýipsizdik, damý jáne qorshaǵan ortany qorǵaý arasynda tepe-teńdikti qamtamasyz etýge mindetti. Ásirese avıatsııany dekarbonızatsııalaýǵa, ınnovatsııalyq tehnologııalardy engizýge jáne jańa býyn mamandaryn daıarlaýǵa erekshe nazar aýdarý qajet. Búgingi ortaq sheshimimiz erteńgi avıatsııanyń qandaı — qaýipsiz, turaqty, ınnovatsııalyq ári barshaǵa qoljetimdi bolatynyn aıqyndaıdy, — dep atap ótti Salvatore Shakkıtano.
IKAO Assambleıasynyń osy sessııasy aıasynda 193 múshe-memlekettiń daýys berýi arqyly IKAO-nyń jańa Keńesi 36 eldiń ókilinen saılanady. Sonymen qatar, aldaǵy úsh jylǵa arnalǵan IKAO bıýdjeti bekitiledi, ótken kezeńdegi tehnıkalyq, quqyqtyq, ekonomıkalyq jáne qarjylyq baǵyttardaǵy, sondaı-aq tehnıkalyq kómek kórsetý salasyndaǵy jumys qorytyndylary men 2028 jylǵa deıingi strategııalyq mindetter qarastyrylady.
Assambleıanyń 42-sessııasynyń aldyn ala kún tártibine áýe kóliginiń ekonomıkalyq damýy, ushý qaýipsizdigi men aeronavıgatsııa salasyndaǵy basym baǵyttar, formaldylyqty jeńildetý jónindegi jetistikter, IKAO-nyń Jolaýshylardy sáıkestendirý baǵdarlamasy strategııasyn iske asyrý barysy, avıatsııalyq qaýipsizdik saıasatyndaǵy negizgi ózgerister, qorshaǵan ortany qorǵaý, klımattyń ózgerýi, halyqaralyq avıatsııa úshin kómirtegi shyǵaryndylaryn azaıtý (CORSIA), adamı resýrstardy basqarý jáne genderlik teńdik, áleýetti arttyrý jáne engizýdi qoldaý, avıatsııa salasyndaǵy ınnovatsııalar jáne basqa da máselelerge qatysty 39 tarmaq engizilgen.
IKAO Assambleıasynyń Atqarýshy komıteti men beıindi komıssııalarynyń otyrysy aıasynda qazaqstandyq delegattar ushý qaýipsizdigin jáne avıatsııalyq qaýipsizdikti kúsheıtýge baǵyttalǵan 33 bastamany tanystyrady. Usynylǵan sheshimder aldaǵy úsh jylǵa arnalǵan jahandyq azamattyq avıatsııa kún tártibin aıqyndaıtyn mańyzdy qujattardy qalyptastyrýdyń negizi bolady.
Assambleıanyń 42-sessııasy aıasynda IKAO-nyń «Jahandyq kókjıekter: avıatsııaǵa arnalǵan ınklıýzıvti ınnovatsııalar» taqyrybyndaǵy Innovatsııalar jármeńkesi ótti.
Qatysýshylar, sonyń ishinde memleketterdiń, halyqaralyq uıymdardyń, ónerkásiptiń, jeke sektordyń, ǵylymı ortanyń, azamattyq qoǵam uıymdarynyń, BUU men ÚEU ókilderi, avıatsııadaǵy ınnovatsııalar jáne onyń BUU-nyń Turaqty damý maqsattaryna qol jetkizýdegi úlesi týraly pikirtalas ótkizdi.
Jármeńkede IKAO-nyń Innovatsııalar jónindegi saıasatyn ilgeriletý, talqylaý jáne iske asyrýǵa qoldaý kórsetý boıynsha usynystar aıtyldy. Kórme aýmaǵynda qazirdiń ózinde qoldanystaǵy nemese avıatsııada qoldanylýy múmkin birqatar jańa tehnologııalar men ıdeıalar usynyldy.
Aıta keteıik, Halyqaralyq azamattyq avıatsııa uıymy (IKAO) — 1944 jyly qurylǵan BUU-nyń mamandandyrylǵan mekemesi. IKAO qurylymynda 7 óńirlik bıýro bar. Qazaqstan Respýblıkasy 1992 jyldan bastap IKAO-nyń múshesi bolyp tabylady jáne Parıj qalasyndaǵy Eýropalyq jáne Soltústik Atlantıkalyq bıýroǵa (EUR/NAT) akkredıtatsııalanǵan.
Qazaqstannyń bastamalary (jumys jáne aqparattyq qujattar) Kanada, Monreal qalasynda ótetin IKAO-nyń 42-shi Assambleıasy aıasyndaǵy Tehnıkalyq, Quqyqtyq, Ákimshilik komıssııalar men Atqarýshy komıtettiń otyrystarynda usynylady.
IKAO-nyń jumys qujattary — memleketter men IKAO organdary sessııada talqylaý men sheshim qabyldaý úshin usynatyn negizgi resmı materıaldar.
Bul qujattarda saıasat, ushý qaýipsizdigi, avıatsııalyq qaýipsizdik, qorshaǵan ortany qorǵaý, navıgatsııa, jolaýshylardyń quqyqtary máseleleri boıynsha naqty sharalar men sheshimder kórsetiledi jáne olar IKAO-nyń qararlary men tapsyrmalaryn ázirleýge negiz bolady. Bul qujattar aldaǵy úsh jylǵa arnalǵan jahandyq azamattyq avıatsııanyń kún tártibi men qorytyndy sheshimderin qalyptastyrady.
Aqparattyq qujattar — múshe memleketterge aqparat úshin usynylady jáne sheshim qabyldaýdy talap etpeıdi.
Eske sala keteıik, buǵan deıin Kólik mınıstrligi Qazaqstannan álemniń 31 eline tikeleı ushýǵa bolatynyn málimdegen edi.