Qazaqstan IYU aıasynda kreatıvti ındýstrııalar baǵdarlamasyn usyndy
QAZAN. KAZINFORM — Qazan qalasynda «Qazan — ıslam áleminiń mádenı astanasy» jylynyń ashylýy aıasynda Islam yntymaqtastyǵy uıymyna múshe elder mádenıet mınıstrleriniń sezi ótti. Bul týraly Mádenıet jáne aqparat mınıstrligi málim etti.
«Dıalog óneri: Reseı men ıslam álemi elderiniń álemdik mádenı murany saqtaýdaǵy róli» taqyrybyndaǵy jıyn Tatarstan Respýblıkasynyń Raısy Rýstam Mınnıhanovtyń quttyqtaý sózimen ashyldy.
Sezde Reseı Federatsııasynyń mádenıet mınıstri Olga Lıýbımova, túrikmen halqynyń Ulttyq kóshbasshysy, Túrikmenstan Halk Maslahatynyń tóraǵasy Gýrbangýly Berdimuhamedov jáne basqa da mártebeli meımandar sóz sóıledi.
— Jıyn barysynda Qazaqstan Respýblıkasy Premer-mınıstriniń orynbasary — Mádenıet jáne aqparat mınıstri Aıda Balaevanyń sezd qatysýshylaryna arnalǵan beıneúndeýi tyńdaldy. Óz sózinde ol Qazan qalasyn 2026 jyly «Islam áleminiń mádenı astanasy» mártebesine ıe bolýymen quttyqtap, elder arasyndaǵy mádenı dıalogty odan ári tereńdetýdiń mańyzyn atap ótti, — delingen habarlamada.
Úkimet basshysynyń orynbasary beıneúndeýde birqatar naqty bastama usyndy. Aıda Balaeva Islam yntymaqtastyǵy uıymy aıasynda kreatıvti ındýstrııalardy qoldaýǵa arnalǵan baǵdarlama ázirleý qajet ekenin aıtty. Bul bastama jas avtorlardy qoldaýǵa, mádenı eksportty keńeıtýge, sondaı-aq mýzyka, dızaın, tsıfrlyq óner jáne basqa da shyǵarmashylyq baǵyttardaǵy birlesken jobalardy ilgeriletýge múmkindik beredi.
— Búginde birqatar elderde kreatıvti ındýstrııalardyń ekonomıkaǵa qosatyn úlesi ishki jalpy ónimniń 3-7 paıyzyna deıin jetip otyr jáne bul kórsetkish turaqty túrde ósip keledi. Mundaı baǵdarlamany iske qosý jas avtorlardy qoldaýdyń jáne aımaq elderiniń mádenı eksportyn keńeıtýdiń tıimdi quraly bola alady, — delingen beıneúndeýde.
Sondaı-aq Aıda Balaeva Islam yntymaqtastyǵy uıymyna múshe memleketterdiń elektrondy kitaphanalaryn, arhıvterin, mýzeı qorlaryn jáne bilim berý kontentin biriktiretin ortaq tsıfrlyq mádenı platforma qurýdy usyndy. Onyń aıtýynsha, zamanaýı tehnologııalar mádenı murany saqtaýǵa, oǵan qoljetimdilikti arttyrýǵa jáne jastardy mádenı úderisterge keńinen tartýǵa jol ashady.
Aıta keteıik, Islam yntymaqtastyǵy uıymyna búginde 57 memleket múshe. Uıym 1,4 mıllıardtan astam adamdy biriktiredi. Qazaqstan IYU aıasyndaǵy mádenı-gýmanıtarlyq yntymaqtastyqty halyqtardy jaqyndastyratyn, ortaq rýhanı keńistikti nyǵaıtatyn mańyzdy baǵyttardyń biri retinde qarastyrady.
Aıta keteıik, buǵan deıin Aıda Balaeva Kreatıvti ındýstrııa Qazaqstannyń jańa ekonomıkalyq saıasatynyń mańyzdy baǵytyna aınalyp kele jatqanyn aıtqan edi.
