Qazaqstan ICAO-nyń avıatsııalyq qaýipsizdik kórsetkishi boıynsha úzdik 20 eldiń qataryna kirdi
ASTANA. KAZINFORM- Premer-mınıstr Oljas Bektenov Halyqaralyq azamattyq avıatsııa uıymynyń (ICAO) Bas hatshysy Hýan Karlos Salasarmen Qazaqstan men uıym arasyndaǵy yntymaqtastyqty nyǵaıtý máselelerin talqylady. Qazaqstan avıatsııalyq qaýipsizdik deńgeıi boıynsha 95,7% kórsetkishimen álemdegi úzdik 20 memlekettiń qataryna kiredi.
QR Úkimeti baspasóz qyzmetiniń habarlaýynsha, Oljas Bektenov Astanaǵa «Avıatsııalyq qaýipsizdik – 2026» aptalyǵyna qatysý úshin kelgen Hýan Karlos Salasarmen kezdesti. Bul – ICAO Bas hatshysynyń Ortalyq Azııa elderine jasaǵan alǵashqy resmı sapary.
Kezdesýde Qazaqstannyń ICAO-men yntymaqtastyǵyn odan ári nyǵaıtý máseleleri qaraldy. Sondaı-aq elimizde ekonomıkanyń barlyq basym salalarynda turaqty progresti qamtamasyz etýge baǵyttalǵan aýqymdy reformalarǵa nazar aýdaryldy.
Oljas Bektenov Memleket basshysy Qasym-Jomart Toqaev Qazaqstannyń kólik-logıstıkalyq áleýetin damytýǵa, avıatsııalyq habtar qalyptastyrýǵa jáne eldiń tranzıttik rólin nyǵaıtýǵa erekshe mán berip otyrǵanyn atap ótti. Onyń aıtýynsha, ICAO-men ózara is-qımyl Qazaqstannyń avıatsııa salasy úshin strategııalyq mańyzǵa ıe.
Hýan Karlos Salasar Qazaqstannyń avıatsııalyq qaýipsizdikti qamtamasyz etýdegi jetistikterin joǵary baǵalady. Ol elimizde áýejaı jáne aeronavıgatsııalyq ınfraqurylymdy damytý men nyǵaıtýǵa qatysty mańyzdy sheshimder qabyldanyp jatqanyn, al qazaqstandyq avıakompanııalar áýe flotyn jańǵyrtyp, halyqaralyq marshrýttyq jelini keńeıtip jatqanyn atap ótti.
Kezdesýge qatysýshylar Qazaqstannyń azamattyq avıatsııasynyń damýynda oń serpin bar ekenin aıtty. Sońǵy bes jylda avıatsııa salasynyń jalpy qyzmeti 6,5 ese ósip, 2,9 mlrd dollarǵa jetti. 2025 jyldyń qorytyndysy boıynsha áýejaılardaǵy jolaýshylar aǵyny 31,8 mln adamdy qurady, al halyqaralyq marshrýttyq jeli 161 baǵytqa deıin keńeıdi.
Qol jetkizilgen nátıjeler halyqaralyq standarttardy dáıekti túrde engizýdiń jáne qazaqstandyq mamandardyń joǵary kásibıliginiń arqasynda múmkin boldy. Salanyń áleýetin odan ári ashý úshin Qazaqstannyń azamattyq avıatsııasyn damytýdyń 2050 jylǵa deıingi master-josparynyń (CAMP-2050) mańyzdylyǵy atap ótildi. Qujat salany jańǵyrtý, avıatsııalyq habtar qalyptastyrý jáne Qazaqstannyń halyqaralyq básekege qabilettiligin arttyrýdyń strategııalyq baǵyttaryn aıqyndaıdy.
Kezdesý qorytyndysynda Oljas Bektenov pen Hýan Karlos Salasar qaýipsizdikti odan ári kúsheıtý jáne azamattyq avıatsııanyń ornyqty damýyn qamtamasyz etý úshin Qazaqstan men ICAO arasyndaǵy yntymaqtastyqty nyǵaıtyp, birlesken kúsh-jigerdi jumyldyrý nıetin rastady.
Osyǵan deıin Qazaqstannyń avıatsııalyq oqıǵalardy tergeý salasynda IKAO tájirıbesin engizetini týraly jazdyq.
