Qazaqstan Ibrahım kelisimine nege qosyldy
ASTANA. KAZINFORM – Qazaqstan Izraıl men arab jáne musylman álemi arasyndaǵy yntymaqtastyq platformasy sanalatyn Ibrahım kelisimine qosylady. Kazinform agenttiginiń tilshisimen sóılesken sarapshylar bul qadamnyń nege dál qazir jasalǵanyn jáne onyń Taıaý Shyǵystaǵy beıbitshilik úderisine qalaı áser etýi múmkin ekenin túsindirdi.
«Eýrazııalyq monıtorıng» analıtıkalyq zertteýler ortalyǵynyń dırektory Álibek Tájibaev Qazaqstannyń Ibrahım kelisimine qosylý sheshimi eldiń syrtqy saıasatynyń prıntsıpterine sáıkes keletinin atap ótti. Astana bul pozıtsııasyn BUU jáne basqa da halyqaralyq uıymdardyń alańdarynda turaqty túrde jarııalap keledi. Bul qadam Qazaqstannyń álemdik saıasattaǵy konstrýktıvti qatysýshy jáne dıalogty qoldaýshy retinde ımıdjin odan ári nyǵaıtady.
Saparshy Qazaqstannyń deldaldyq tájirıbesine de nazar aýdardy.
- Qazaqstan dástúrli túrde kópjaqty dıalogty, deldaldyqty jáne qaqtyǵystardy báseńdetýdi qoldaıdy, sonyń ishinde Taıaý Shyǵysta, munda Sırııa boıynsha astanalyq protsesti bastaý arqyly jáne bedeldi beıbit kelissózder formattaryn qoldaı otyryp mańyzdy ról atqarady, - deıdi ol.
Aımaqtyq ıntegratsııany zertteý ınstıtýtynyń jetekshisi Taısııa Marmontova Qazaqstan Izraılmen 30 jyldan astam dıplomatııalyq qatynasta ekenin eske saldy.
- Bul platformaǵa sımvolıkalyq túrde qosylý, nólden bastaý emes. Biz árqashan beıbitshilik ornatýshylar bolyp, kópjaqty kommýnıkatsııa salasynda jumys isteımiz. Praktıkada Izraıl men Parsy shyǵanaǵy elderiniń qatysýymen keıbir qoldanbaly yntymaqtastyq joldary, sondaı-aq ekonomıkalyq kelisimdermen baılanysqan qosymsha saıası kapıtal bolýy múmkin, - dedi spıker.
Álibek Tájibaevtyń aıtýynsha, bul sheshimniń ózektiligi geosaıası shıelenistiń artýy jáne Shyǵys pen Batys arasyndaǵy logıstıkanyń ózgerýi jaǵdaıynda kúsheıedi.
- Qazaqstan jahandyq ózgerister jaǵdaıynda jańa ınvestıtsııa, tehnologııa men seriktester izdeıdi, al kelisim Izraıl, AQSh jáne Parsy shyǵanaǵy elderiniń naryǵy men qaýipsizdik júıelerine qol jetkizýge múmkindik beredi. Bul mehanızm arqyly batys elderiniń yqpaly qaýipsizdik kepildigin nyǵaıtyp, eldi qazirgi zamanǵy, joǵary tehnologııalyq, tsıfrlyq, medıtsınalyq jáne agrarlyq jobalardy damytýǵa baǵyttaıdy, - deıdi ol.
Ibrahım kelisimine qosylý Qazaqstannyń Palestınaǵa qatysty ustanymyn ózgertpeıdi
QR Syrtqy ister mınıstrligi men sarapshylar Ibrahım kelisimderine qosylý Qazaqstannyń Palestına-Izraıl daǵdarysyna qatysty resmı ustanymyn ózgertpeıtinin atap ótti. Bul ustanym halyqaralyq quqyq normalaryna, BUU rezolıýtsııalaryna jáne «eki halyqqa eki memleket» prıntsıpine negizdelgen.
Memlekettik saıasat ınstıtýtynyń syrtqy saıasat zertteýleri jónindegi basqarma tóraǵasynyń orynbasary, saıası ǵylymdar kandıdaty Manarbek Kabazıev bastamanyń beıtaraptyǵy men salmaqtylyǵyna toqtaldy.
- Qazaqstan áskerı bloktarǵa qosylmaıdy, sanktsııalyq nemese konfrontatsııalyq tásilderdi qoldamaıdy. Biz Reseı, Qytaı, ıslam álemi elderi, Batys jáne Shyǵys elderimen teń quqyqtyq negizde qatynasty saqtaımyz. Ibrahım kelisimine qatysý - baǵytty ózgertý emes, bul Qazaqstannyń turaqtylyq pen órkendeý úshin múdde balansyn qura alý qabiletin rastaý, - dedi ol.
Sarapshynyń sózinshe, palestınalyq halyqty qoldaý ózgerissiz qalyp otyr.
- Qazaqstan memleketi men qoǵamy palestınalyqtarǵa birligin kórsetýdi jalǵastyryp, olardyń táýelsizdik pen qaýipsizdikke quqyǵyn qoldaıdy. Ibrahım kelisimderine qatysý osy ustanymnan bas tartýdy bildirmeıdi. Kerisinshe, Qazaqstan palestınalyq halyq múddesi úshin dıalog pen gýmanıtarlyq bastamalardy ilgeriletýge jańa dıplomatııalyq múmkindikterdi paıdalana alady, - deıdi Kabazıev.
Ol sondaı-aq Qazaqstannyń zaıyrly basqarý úlgisi men ıslamdyq sáıkestigi bar el retinde túrli aımaqtar arasynda biregeı deldal bola alatynyn, senim, ınnovatsııa jáne yntymaqtastyqtyń jańa ortalyqtaryn jasaı alatynyn atap ótti.
- Ibrahım kelisimine qosylý strategııalyq mańyzdy jáne aldaǵy bolashaqqa baǵyttalǵan qadam. Bul Qazaqstannyń halyqaralyq bedelin nyǵaıtyp, ekonomıkalyq múmkindigin keńeıtedi jáne beıbitshilik mıssııasyna jańa ólshem qosady. El ıslamdyq dástúrler men qoǵamnyń rýhanı negizderin árdaıym qurmetteıdi. Bul qadam osy baǵytty ózgertpeıdi, kerisinshe, ıslam rýhyna jaqyn beıbitshilik pen ózara qurmet ıdealdaryn kórsetedi. Qazaqstan - musylmandar kópshiligi bar zaıyrly memleket retinde halyqtar arasyndaǵy beıbit qatar ómir súrý men yntymaqtastyq dindik jáne moraldyq qaǵıdalarǵa qaıshy kelmeıtinin dáleldeıdi, - dep túsindirdi sarapshy.
Aıta keteıik, Qazaqstan Ibrahım kelisimine qosylady.
Óz kezeginde Syrtqy ister mınıstrligi Ibrahım kelisimi Qazaqstannyń álem elderimen yntymaqtastyǵyn nyǵaıtatynyn málim etti.
Jalpy, Ibrahım kelisimderi degenimiz ne? Tolyǵyraq siltemege ótip tanysýǵa bolady.