Qazaqstan Huida Tech-pen birlesip agrotehnologııalyq ekojúıe qurady
ASTANA.KAZINFORM - Joba aýyl sharýashylyǵy drondary men avtopılot júıelerin qurastyrýdy oqshaýlaýdy, birlesken R& D ortalyqtaryn qurýdy jáne tsıfrlyq agroónerkásip kesheni úshin bilikti kadrlardy daıarlaýdy qamtıdy.
Shanhaıǵa (QHR) jumys sapary jáne WAIC — Jasandy ıntellekt jónindegi dúnıejúzilik konferentsııaǵa qatysý aıasynda Premer-mınıstrdiń orynbasary — Jasandy ıntellekt jáne tsıfrlyq damý mınıstri Jaslan Mádıev «Heilongjiang Huida Technology Co., Ltd.» kompanııasynyń negizin qalaýshy jáne bas dırektory Chjan ıÝımen kelissózder júrgizdi.
Kezdesý qorytyndysy boıynsha Jasandy ıntellekt jáne tsıfrlyq damý mınıstrligi, Freedom Holding Corp. jáne Huida Tech arasynda strategııalyq yntymaqtastyq týraly memorandýmǵa qol qoıyldy.
Qazaqstan jabdyqtardy qarapaıym satyp alýdan bas tartyp, tolyqqandy óndiristik ekojúıeni qalyptastyrýǵa bet buryp otyr. Joba aýyl sharýashylyǵy drondary men avtopılot júıelerin qurastyrýdy oqshaýlaýdy, birlesken R& D ortalyqtaryn qurýdy jáne tsıfrlyq agroónerkásip kesheni úshin bilikti kadrlardy daıarlaýdy qamtıdy.
— Biz jaı ǵana tehnıka jetkizýdi talqylap otyrǵan joqpyz, biz ındýstrııa qurýdy maqsat etip otyrmyz. Qazaqstan óndiristi oqshaýlaý úshin barlyq qajetti jaǵdaıdy, sonyń ishinde salyqtyq jeńildikter men aýyl sharýashylyǵynda ozyq JI-sheshimderin engizý úshin retteýshilik qumsalǵyshty usynýǵa daıyn. Biz ozyq qytaılyq tehnologııalardyń bizdiń qajettilikterimizge beıimdelip, Ortalyq Azııa men EAEO naryqtaryna shyǵýyn qalaımyz, — dep atap ótti Jaslan Mádıev.
Áriptestik aıasynda qazaqstandyq tarap derekter egemendigi men tehnologııa transferine erekshe nazar aýdaryp, oqshaýlanǵan sheshimderdiń aýyl sharýashylyǵyn tsıfrlandyrýdyń memlekettik ınfraqurylymyna ıntegratsııalanýyn qamtamasyz etedi.
Esterińizge sala ketsek, «Heilongjiang Huida Technology Co., Ltd.» — bul dál eginshilik tehnologııalaryn ázirleıtin jetekshi qytaılyq kompanııa. Ol spýtnıktik navıgatsııa negizindegi aýyl sharýashylyǵy tehnıkasyna arnalǵan avtomatty basqarý júıelerin, agrohımııalyq jumystarǵa jáne júk tasymaldaýǵa arnalǵan aýyl sharýashylyǵy drondaryn, sondaı-aq monıtorıngtik IoT-termınaldaryn, topyraq baqylaý datchıkterin jáne avtomattandyrylǵan tamshylatyp sýarý júıelerin óndirýge mamandanǵan.
Aıta ketelik Qasym-Jomart Toqaev Qytaıdyń jetekshi kompanııalary basshylarymen kezdesken edi.
