Qazaqstan hokkeıshileri overtaımda AQSh quramasynan jeńildi - ÁCh
ASTANA. QazAqparat - Mınskide ótip jatqan álem chempıonatynda Qazaqstan hokkeı quramasy AQSh sportshylarymen bolǵan oıynda bir upaı oljalady. "Mınsk-Arena" stadıonynda ótken oıyn 4:3 esebimen AQSh quramasynyń paıdasyna sheshildi.
Alǵashqy shaıbany 15-shi mınýtta qazaqstandyqtar saldy. Onyń avtory - Roman Starchenko. Biraq 19-mınýtta bir oıynshymyz 2 mınýttyq jazaǵa iligip, qarsylastarǵa esepti teńestirip ketýge jol berip qoıdy. Kreıg Smıt qaqpashy Alekseı Ivanovty aldap ótip, AQSh quramasynyń osy oıyndaǵy alǵashqy golyn saldy.
Ekinshi aınalymda Konstantın Romanovtyń golynan keıin Arı-Pekkı Selın jattyqtyratyn qazaqstandyq hokkeıshiler taǵy da alǵa shyqqan bolatyn. Degenmen Mıhaıl Panshın qos mınýtqa aıyptalyp, Set Djonstyń golmen erekshelenýine múmkindik jasap aldy. Keıin Mett Donovan AQSh sportshylaryn tipti alǵa shyǵardy. Úshinshi aınalymda Konstantın Romanovty qaqpa aldynda jyqqany úshin býllıt taǵaıyndaldy. Biraq Romanov amerıkalyq qaqpashyny aldap óte almady. Degenmen Qazaqstan hokkeıshileri 54-mınýtta úshinshi gol soǵyp, oıyndy overtaımǵa oıystyrdy. Overtaımda ekinshi mınýtta gol avtory atanǵan Set Djons qarsylastarǵa jeńis áperdi. Osy matchtan keıin Qazaqstan enshisinde eki upaı bar. Kelesi oıyndy Qazaqstan quramasy 17 mamyrda Shveıtsarııaǵa qarsy ótkizedi. Aıta keteıik, bunyń aldynda qazaqstandyq hokkeıshiler Germanııa quramasynan overtaımda jeńildi, sosyn Belarýs (1:4), Latvııa (4:5) men Reseı (2:7) oıynshylaryna jol berip qoıdy.
