Qazaqstan hokkeıden jastar arasyndaǵy Álem chempıonatynda iri jeńiske jetti
NUR-SULTAN. QazAqparat – Qazaqstan quramasy (U-20) hokkeıden jastar arasyndaǵy Álem chempıonaty-2022-niń birinshi dıvızıonynda úshinshi matchyn ótkizdi, dep habarlaıdy QazAqparat Sports.kz saıtyna silteme jasap.
A tobyndaǵy úshinshi oıynda Qazaqstan Danııany 4:1 esebimen jeńdi.
32-mınýtta Konstantın Morojnıkov el quramasyn alǵa shyǵardy, 34-te ol dýbl jasady. Alaıda dattyqtar birden bir shaıbanyń esesin qaıtardy, mergendik kórsetken – Lýkas Bang.
Kóp uzamaı qazaqstandyqtar taǵy bir shaıba soǵyp, basymdyǵyn qaıtara aldy: 45-mınýtta Rýslan Ospanovtyń soqqysy nátıjeli boldy. Al oıyn núktesin 60-mınýtta Nıkolaı Shýlga qoıdy.
Osylaısha, Qazaqstannyń jastar quramasy týrnır aıasyndaǵy eki matchta jeńiske jetti: buǵan deıin olar Majarstandy (3:1) jeńdi. Odan keıin Norvegııaǵa iri eseppen ese jiberip aldy (2:5).
16 jeltoqsanda Qazaqstan Belarýspen oınaıdy, 18 jeltoqsanda – Latvııamen.
Eske salaıyq, týrnır reglamentine sáıkes, elıtaly dıvızıonǵa tek toptaǵy jeńimpaz ótedi.
