Qazaqstan – hokkeıden 2027 jylǵy álem chempıonatyn ótkizýden eki úmitkerdiń biri
Shampionat.com saıtynan alynǵan málimetke qaraǵanda, Norvegııa hokkeı qaýymdastyǵy (NIHF) atalmysh dodany ótkizýden resmı túrde bas tartqan.
Mundaı sheshim Norvegııa úkimeti tarapynan qarjy bólinbeýine baılanysty qabyldanǵan. Eldiń mádenıet mınıstrligi týrnırdi Berým men Tronheımde ótkizýdi qarastyrǵan ótinimdi qarjylandyrýdan bas tartqan.
Norvegııa budan buryn shaıbaly hokkeıden 1999 jylǵy álem chempıonatyn qabyldaǵan bolatyn.
Norvegııa hokkeı qaýymdastyǵy mundaı sheshimge ókinish bildire otyryp, aldaǵy ýaqytta qarjylandyrý máselesin áriptesterimen birge sheshýge múddeli ekendigin málimdedi. 2028 jylǵy birinshilikti ótkizý jóninde jańa ótinim berý baǵytynda jumys bastalady.
Germanııa men Qazaqstan 2027 jylǵy álem chempıonatyn ótkizý quqyǵyn ıelený jolyndaǵy kúresti jalǵastyrady. Halyqaralyq shaıbaly hokkeı federatsııasy atalǵan birinshiliktiń ıesin 2023 jylǵy mamyr aıynda ótetin kongresinde anyqtaıtyn bolady.
Eske sala keteıik, budan buryn qysqy ýnıversıadaǵa qatysatyn Qazaqstan hokkeı quramasy anyqtalǵanyn jazǵan bolatynbyz.