Qazaqstan hokkeıi: Sáttilik serik bolǵan jyl
Ótken jyl Qazaqstan hokkeıshileri úshin tabysty jyl boldy. Ulttyq, jastar jáne jasóspirimder quramalary álem chempıonatynyń top-dıvızıonynda oıyn kórsetedi. Bul el tarıhynda alǵashqy márte kezdesip otyr. Sondaı-aq, elordalyq «Nomad» komandasy Qurlyqtyq kýbok oıyndarynda el namysyn qorǵaıdy. Kazinform atalǵan jeńister, jetistikter jóninde tarazyǵa salyp kórdi.
Ulttyq quramanyń jetistigi
Ulttyq qurama 2023 jyly álem chempıonaty elıtalyq dıvızıonynda jaqsy oıyn kórsetkishimen kózge tústi. Qazaqstandyq hokkeıshiler bıylǵy álem chempıonatynda alty kezdesý ótkizdi. Buǵan deıin býllıtten Slovakııany býllıtten, Norvegııany jáne Slovenııany 4:3 esebimen jeńdi. Al Chehııaǵa 1:5, Shveıtsarııaǵa 0:5, Kanadaǵa 1:5, Latvııaǵa 0:7 esebimen jol berdi.
El quramasy V tobynda jeti oıynnan keıin jeti upaımen altynshy orynǵa taban tirep, álem chempıonatynyń elıtalyq dıvızıondaǵy ornyn saqtap qaldy. Osylaısha úzdikter qatarynda tórtinshi jyl qatarynan oıyn kórsetýge múmkindik aldy.
Atap óterligi, budan burynǵy jyldarda el quramasy sapynda Qazaqstan azamattyǵyn qabyldaǵan sheteldik hokkeıshiler oıyn kórsetken edi. Ótken jyly dúbirli dodada qazaqstandyq oıynshylar el namysyn qorǵaýǵa múmkindik aldy.
Endi olar 2024 jyldyń 10-26 mamyry aralyǵynda Chehııanyń Praga jáne Ostrava qalalarynda on alty quramanyń qatarynda synǵa túsedi. Olar A tobynda (Ostrava) AQSh, Germanııa, Shvetsııa, Slovakııa, Latvııa, Frantsııa, Polshamen sheberlik baıqasady.
Byltyr ulttyq qurama tizginin ustaǵan qazaqstandyq Ǵalym Mámbetálıev sol qyzmetin bıyl da jalǵastyrady. Bul sheshim Qazaqstan hokkeı federatsııasynyń konferentsııasy otyrysynda qabyldandy.
Ǵalym Mámbetálıev 1965 jyly Qaraǵandy oblysy Temirtaý qalasynda dúnıege kelgen. 1980-2002 jyldarda qazaqstandyq jáne Reseıdiń «Mostovık» komandalarynda oınady. 2002 jyldan beri bapkerlikpen aınalysyp keledi. 2017 jyly álem chempıonatynda (1A) Qazaqstan quramasyn jattyqtyrǵan edi. Sondaı-aq qysqy ýnıversıadada Qazaqstan stýdentter quramasymen birge qola júldege qol jetkizdi. Pro Hokei Ligasy chempıony atanǵan astanalyq «Nomad» klýbynyń bas bapkeri boldy.
Sondaı-aq Qazaqstan hokkeı federatsııasynyń konferentsııasynda ózge de jas ereksheligi boıynsha qurama bapkerleri taǵaıyndaldy. Elimizdiń 20 jasqa deıingi jastar quramasyna Sergeı Starygın jetekshilik etse, 18 jasqa deıingi jasóspirimder quramasyna Georgıı Vereşagın bas bapker bolady.
Jastardyń jigerli oıyny qýantty
Al shaıbaly hokkeıden 20 jasqa deıingiler arasyndaǵy el quramasy bıyl elıtalyq dıvızıonda oınaýǵa múmkindik aldy. Olar birinshi dıvızıonnyń A tobynda birinshi orynǵa turaqtap, úzdikter qatarynda oınaýǵa joldama aldy.
Birinshi dıvızıondaǵy oıyndarda qazaqstandyq hokkeıshiler Vengrııa (5:2), Danııa (3:2), Frantsııa (4:0) jáne Japonııany (3:1) jeńip, Avstrııadan 6:7 esebimen jeńilip qaldy.
Qazaqstandyq jastar álem chempıonatynyń birinshi dıvızıonynda alty márte oınady. Tórteýinde jeńimpaz atanyp, elıtalyq dıvızıonǵa joldama alǵan edi. Al elıtalyq dıvızıonda segiz márte baq synady. Joǵary jetistigi – 1999 jyly altynshy oryn.
Eske sala keteıik, osy jyldyń sáýirinde bizdiń jasóspirimder IA dıvızıonyndaǵy álem chempıonatynda birinshi oryndy ıelenip, elıtaǵa kóterildi. Ol kezde de Sergeı Starygın jetekshilik etti.
«Nomad» úzdikter qatarynda
Qazaqstandyq «Nomad» komandasy Qurlyqtyq kýbok oıyndarynyń fınaldyq satysynda synǵa túsedi. Onda elordalyq komanda «Kardıff Devılz» (Ýels), «Katovıtse» (Polsha) men «Hernıng Blıý Foks» (Danıı) klýbtarymen oınaıdy. Oıyndar 2024 jyldyń 12-14 qańtar aralyǵynda bolady.
Jarystyń fınaldyq satysy Ýels astanasy Kardıff qalasyndaǵy 3 myń jankúıerge arnalǵan «Vındıko» arenasynda ótkiziledi. Aıta ketsek, «Nomad» óz tarıhynda ekinshi márte jarystyń atalǵan satysynda baq synaýǵa múmkindik alyp otyr.
Budan buryn qazaqstandyq komanda Latvııanyń «Zemgalesin» 4:1, Ýelstiń «Kardıff Devılzin» 5:4, Frantsııanyń «Grenoblin» 2:0 esebimen jeńip, E tobynda birinshi oryn aldy.
«Barys» pleı-offqa shyǵa ma?
Al Qurlyqtyq hokkeı lıgasynda elordalyq «Barys» sátsiz oıyn kórsetýge májbúr. Dúbirli dodaǵa 2008 jyldan beri turaqty túrde qatysyp kele jatqan komanda bıyl týrnır kestesinde 45 oıynnan keıin 37 upaımen nebári 19-orynda keledi.
Maýsym basynda komandaǵa belarýstik Andreı Skabelka jetekshilik etse, odan keıin Ǵalym Mámbetálıev tizgindi ustady. Al keıingi oıyndarda klýbtyń bas bapkeri mindetin atqarýshy bolyp Oleg Bolıakın taǵaıyndaldy. Qýantarlyǵy, sońǵy úsh týrda «Barys» qatarynan úsh márte jeńiske jetti. Aldaǵy ýaqytta pleı-off satysyna shyǵa ala ma? Ony ýaqyt kórsete jatady.
On bes jyldan beri «Barys» úsh márte ǵana pleı-off satysyna shyǵa alǵan joq. Al tórt márte Shyǵys konferentsııasynda jartylaı fınalǵa deıin jetti. Qazaqstandyq jankúıerler jylma-jyl komandanyń joǵary bıikten kóringenin qalaıdy. Dese de sońǵy jyldardaǵy sátsizdik jankúıerler kóńilinen shyqpaı júrgeni jasyryn emes.
Komanda bıyl negizinen jergilikti jastarǵa úmit artyp otyr. Ulttyq qurama sapynda álem chempıonatyna qatysqan qazaqstandyq hokkeıshiler «Barys» quramynda muz aıdynǵa shyǵýǵa múmkindik aldy.
