Qazaqstan hokkeı quramasynyń bas bapkeri qyzmetinen ketetinin málimdedi

Qazaqstan quramasynyń jáne elordalyq «Barystyń» bas tizginin ustaǵan bapker Edýard Zankovets jýrnalısterge bergen suhbatynda aradaǵy kelisimshart merziminiń aıaqtalýyna baılanysty qyzmetinen ketetinin aıtty.

Esterińizge sala keteıik, 47 jastaǵy Belarýs mamany «Barys» HK bas bapkeri qyzmetine ótken jyly 7 qyrkúıekte taǵaıyndalǵan bolatyn. Andreı Nazarovtyń ornyn basqan tájirıbeli bapkerdiń qol astyna ótken astanalyq klýb ótken kezeńde Gagarın Kýbogynyń ekinshi kezeńine deıin jetken bolatyn. 

2016 jyldyń sońynda Zankovetske Qazaqstan quramasyn da basqarý jaýapkershiligi júktelgen bolatyn. Qurama onyń basshylyǵymen álem chempıonatynyń birinshi dıvızıonynda Kıevte bes matchtyń tórtteýinde jeńiske qol jetkizip, bir ret jeńilis tapqan bolatyn.

Zankovets taıaý arada óz eline oralyp, otbasy sharýalarymen aınalysýǵa bel býyp otyr. Qazaqstan hokkeı federatsııasy (QHF) jáne «Barys» HK ázirshe bas bapkerdiń qyzmetinen ketýine baılanysty eshbir málimetter jarııalaǵan joq.

Edýard Zankovets bas bapkerlikke 2007 jyly kelgen. 2007 jyly 21 qańtarda 31 mamyryna deıin Mınskiniń «Dınamo» klýbynda bas bapker boldy. 2010-2011 jyldary Belarýs hokkeı quramasynyń bas bapkeri qyzmetin atqardy. 2011 jyldyń 20 jeltoqsanynda «Avangard» HK bas bapkeriniń kómekshisi retinde jumysqa alyndy. 2015 jyly 26 naýryzda «Avangard» HK bas bapkeri kómekshisi qyzmetinen ketti.

Hokkeıshi retinde ol eńbek jolyn 1986 jyly «Dınamo-Mınsk» komandasynan bastady. 1986-88 jyldary KSRO chempıonatynyń birinshi lıgasynda oınady. 1988-91 jyldary joǵary lıgada óner kórsetti. 1994-96 jyldary Omskiniń «Avangard» sapynda JHL týrnırine qatysty. 1996-98 jyldary 2-býndeslıgada oınady. 1998-99 jyldary 1-býndeslıgaǵa aýysyp, jaqsy nátıjeler kórsetti. 1999-2000 jyldary Soltústik Amerıkada óner kórsetti. Mansabyn Reseı chempıonatynda «Torpedo» klýbynda aıaqtaǵan. Belarýs Respýblıkasynyń eńbek sińirgen sport sheberi.