Qazaqstan hokkeı quramasy Olımpıada joldamasynan tys qaldy

ASTANA. KAZINFORM – Shaıbaly hokkeıden Qazaqstan quramasy fınaldyq olımpıadalyq irikteý kezeńinde Slovakııamen sheshýshi oıyn ótkizdi.

Kezdesý basynan slovakııalyq hokkeıshiler jyldam gol soǵý múmkindigin izdedi. Nátıjesinde olardyń qatarynan Robert Lantoshı 4, Pavol Regenda 12-mınýtta eki shaıba soǵyp ketti.

Ekinshi kezeńde slovakııalyq Adam Lıshka 30-mınýtta mergendik tanytty. Qazaqstandyq Nıkıta Mıhaılıs 35-mınýtta esep aıyrmasyn qysqartty.

Osylaısha qazaqstandyq hokkeıshiler qarsylasyna 1:3 esebimen jeńilip, Olımpıada joldamasynan tys qaldy. 

Alǵashqy eki týrda atalǵan quramalar upaıdan shashaý shyǵarǵan joq. Qazaqstandyq hokkeıshiler Vengrııany 5:2, Avstrııany 2:1 esebimen tize búktirdi. 

Aıta ketsek, 2026 jyly ótetin Qysqy Olımpıadaǵa olımpıadalyq irikteý kezeńinde Slovakııadan basqa Latvııa, Danııa quramalary joldama aldy. 

Dúbirli doda 6-22 aqpan aralyǵynda Italııanyń Mılan jáne Kortına-d’Ampetstso qalalarynda bolady. 

Qazaqstandyq sportshylar Qysqy Olımpıadada 1998, 2006 jyldary baq synaýǵa múmkindik aldy. 1998 jyly jalpy komandalyq esepte segizinshi orynǵa turaqtady. 2006 jyly toptyq kezeńde besinshi oryndy qanaǵat tutyp, jarysty jalǵastyrýdan tys qaldy.

Al 2002, 2010, 2014, 2018, 2022 jyldarda irikteý kezeńinen asa alǵan joq.