Qazaqstan hokkeı quramasy búgin Ulybrıtanııamen joldastyq kezdesý ótkizedi

ASTANA. KAZINFORM - Shaıbaly hokkeıden Qazaqstan quramasy búgin, 7 mamyrda Ulybrıtanııamen joldastyq kezdesý ótkizedi. Bul álem chempıonatyna daıyndyq barysyndaǵy sońǵy oıyn bolady.

Ǵalym Mámbetálıev shákirtteri 5 mamyrda Chehııaǵa jetti. Onda dúbirli dodaǵa daıyndyq barysyn pysyqtap jatyr.

Búgingi kezdesý elorda ýaqytymen 20:00-ge belgilengen.

Qazaqstandyq hokkeıshiler 2021 jyldan beri elıtalyq dıvızıonda oıyn kórsetip keledi.

Qazaqstan quramasy V tobynda Frantsııa, Slovakııa, Latvııa, Shvetsııa, Germanııa, AQSh jáne Polshamen synǵa túsedi.

Alǵashqy oıynyn Qazaqstan quramasy 11 mamyrda Frantsııa quramasyna qarsy ótkizedi.

El quramasy 10 sáýirden bastap elordada ótetin elıtalyq dıvızıondaǵy álem chempıonatyna daıyndyqqa kirisken bolatyn.

Oqý-jattyǵý jıynyna sheteldik jáne otandyq klýbtarda oıyn kórsetetin hokkeıshiler shaqyrý alǵan.

Eske salsaq, ulttyq qurama elordada ótken Qazaqstan Hockey Open týrnırinde Reseıge 0:1, Belarýske overtaımda 4:5 esebimen jeńildi.