Qazaqstan hokkeı quramasy álem chempıonatynda Majarstanǵa ese jiberdi

ASTANA. KAZINFORM — Shaıbaly hokkeıden Qazaqstan quramasy 2025 jylǵy álem chempıonaty elıtalyq dıvızıonyndaǵy úshinshi oıynyn búgin Majarstanǵa qarsy ótkizdi.

Qarsylastar elıtalyq dıvızıonda alǵash ret kezdesip otyr. Qazaqstandyq hokkeıshiler úzdikter qatarynda besinshi jyl qatarynan synǵa túsip jatsa, majarstandyq oıynshylar olardyń qataryna bıyl qosyldy.

Qazirge deıin quramalar birinshi dıvızıonda buǵan deıin toǵyz márte sheberlik baıqasty. Onyń segizinde qazaqstandyq hokkeıshiler jeńiske jetse, qalǵanynda qarsylasyna ese jiberdi.

Kezdesý barysynda majarstandyq qurama sapynan ıAnosh Harı nebári 15-sekýndta esep ashsa, Ishtvan Terboch 18-mınýtta basymdyqty arttyra tústi.

Ekinshi kezeńniń 34-mınýtynda qazaqstandyq Nıkıta Mıhaılıs esep aıyrmasyn qysqartty.

Úshinshi kezeńde majarstandyq hokkeıshiler jyldam eki gol soǵyp ketti. Aldymen Vılmosh Gallo 41-mınýtta mergendik tanytsa, Peter Vıntse 43-mınýtta kózdegen nysanadan múlt ketken joq.

Oıynnyń 59-mınýtynda qazaqstandyq Valerıı Orehov esep aıyrmasyn qysqartty.

Osylaısha el quramasy qarsylasyna 2:4 esebimen ese jiberdi.

Álem chempıonatynda Qazaqstan quramasy V tobynda oınap jatyr. Qarsylastary — Fınlıandııa, Chehııa, AQSh, Germanııa, Danııa, Norvegııa jáne Majarstan. Oıyndar Danııanyń Hernıng qalasynda bolady.

Qazirge deıin Qazaqstan quramasy Norvegııany (2:1) jeńse, Germanııaǵa (1:4) ese jiberdi.

Endi qazaqstandyq hokkeıshiler aldaǵy oıynyn 14 mamyrda Danııa quramasyna qarsy ótkizedi.