Qazaqstan hokkeı federatsııasy Ulttyq sporttyq syılyqtyń úmitkeri atandy
NUR-SULTAN. QazAqparat – Qazaqstan Ulttyq Olımpıada komıtetiniń resmı saıtynda 2019 jyldyń toǵyz túrli nomınatsııasy boıynsha daýys berý bastaldy, dep habarlaıdy «SPORTINFORM» SAA QR UOK baspasóz qyzmetine silteme jasap.
Qazaqstandyq hokkeı birden Ulttyq sport syılyǵynyń tórt nomınatsııasyna usynylyp otyr.
Hokkeıden Qazaqstan ulttyq quramasynyń jáne astanalyq «Barys» komandasynyń oıynshysy Nıkıta Mıhaılıs «Qysqy sport túrleri boıynsha jyldyń úzdik sportshysy» ataǵyna usynyldy. «Qysqy sport túrleri boıynsha jyldyń úzdik jattyqtyrýshysy» nomınatsııasynyń tizimine Qazaqstan jáne «Barys» ulttyq quramasynyń bas bapkeri Andreı Skabelka engen. Taǵy bir - «Jyldyń úzdik komandasy» nomınatsııasynan sol sekildi Qazaqstan ulttyq hokkeı komandasy úmitti. Al «Olımpıadalyq sport salasyndaǵy jyldyń úzdik ulttyq sport federatsııasy» nomınatsııasyna Qazaqstan hokkeı federatsııasy (QHF) ilingen.
Ulttyq sport marapaty Qazaqstan UOK Prezıdenti Tımýr Qulybaevtyń bastamasymen belgilengen. Syılyq bıyl 30 qarashada saǵat 18:00-de «Qazaqstan» ortalyq kontsert zalynda tapsyrylady. Qazaqstan UOK resmısaıtynda súıikti sportshylaryńyz ben komandalaryńyzǵa daýys berýge múmkindik bar.
Barlyq nomınatsııalar tizimi mynadaı:
«Qysqy sport túrleri boıynsha jyldyń úzdik sportshysy»;
«Úzdik jas sportshy»;
«Jazǵy sport túrleri boıynsha jyldyń úzdik jattyqtyrýshysy»;
«Qysqy sport túrleri boıynsha jyldyń úzdik jattyqtyrýshysy»;
«Úzdik ulttyq sport federatsııasy»
«Olımpıadalyq sporttaǵy jyldyń «Úzdik sporttyq aımaǵy» (oblystardyń, respýblıkalyq mańyzy bar qalanyń, astananyń dene shynyqtyrý jáne sport basqarmasy);
«Jyl serpini»;
«Jyldyń úzdik komandasy».
Saltanatty shara aıasynda paralımpıadalyq sportshylarǵa arnaıy syılyqtar da beriletindigin erekshe atap ótken jón. Osy jylǵy syılyqqa «Keshendi-ǵylymb toptyń úzdik mamany» nomınatsııasy qosylyp otyr.
Syılyqty tabystaý keshinde otandyq juldyzdardyń qatysýymen erekshe kontserttik baǵdarlama ótedi. Keshte Ninety One toby, NaZima, Moldanazar, Saı Mo jáne basqalar án shyrqaıdy.
