Qazaqstan HEU-nyń eń tómengi jalaqyǵa qatysty konventsııasyn ratıfıkatsııalamaq
ASTANA. KAZINFORM — Eńbek mınıstrligi «Kásipodaqtardyń avtomattandyrylǵan jumys orny» atty tsıfrlyq modýl engizedi. Bul týraly Eńbek jáne halyqty áleýmettik qorǵaý vıtse-mınıstri Asqarbek Ertaev aıtty.
— Qazirgi ýaqytta áleýmettik áriptestik barlyq deńgeıde qalyptasty jáne 2,5 mıllıonnan astam jumysshyny biriktiretin kásiptik odaqtar jumys isteıdi. Qazaqstan kásipodaqtary — bul ekonomıkalyq damý men qoǵamdaǵy áleýmettik turaqtylyq maqsattaryna qol jetkizýdegi Úkimettiń belsendi qatysýshylary jáne seriktesteri. Memleket eńbek qatynastary sýbektileriniń múddelerin tıimdi úılestire alatyn, myqty ári jaýapty kásipodaqtardyń bolýyna múddeli. Óıtkeni kásipodaqtardyń qoǵamdyq qatynastardy retteýdegi róli qanshalyqty mańyzdy bolsa, olar ózderiniń basty maqsaty — jumysshylardyń áleýmettik-eńbek quqyqtary men múddelerin qorǵaý mindetin sonshalyqty tıimdi ári tabysty oryndaı alady, — dedi ol Qazaqstan Kásipodaqtar federatsııasynyń XXVII sezinde.
Vıtse-mınıstr Memleket basshysy Qasym-Jomart Toqaev 2025 jyldy Jumysshy mamandyqtarynyń jyly dep jarııalaǵanyn atap ótti. Bul — jumysshy mamandyqtarynyń el damýyna qosqan eńbegi men úlesin erekshe moıyndaýdyń belgisi. Osyǵan baılanysty eńbek jaǵdaıyn jaqsartýǵa jáne jumysshylardyń áleýmettik qorǵalýyn kúsheıtýge baǵyttalǵan aýqymdy jumystar júrgizilip jatyr.
Halyqaralyq eńbek uıymynyń qoldaýymen eń tómengi aılyq jalaqy mólsherin anyqtaý ádistemesi ázirlenip, bekitildi. Onda negizgi kórsetkishter retinde eńbek ónimdiligi men medıanalyq jalaqy belgilengen.
— Biz HEU-nyń «Damýshy elderdi erekshe eskere otyryp, eń tómengi jalaqyny belgileý týraly» № 131 konventsııany ratıfıkatsııalaý jumysyna kiristik. Tıisti zań jobasy ázirlenip, qazirgi ýaqytta Parlament Májilisinde qaralyp jatyr, — dedi vıtse-mınıstr.
Onyń atap ótýinshe, Eńbek mınıstrligi «Kásipodaqtardyń avtomattandyrylǵan jumys orny» atty tsıfrlyq modýl engizýde. Bul kásipodaqtarǵa óz músheleriniń derekterin avtomatty túrde tirkeýge, qaǵaz qujat aınalymynan bas tartýǵa, qoǵamdyq baqylaýdy elektrondy formatta júzege asyrýǵa, sondaı-aq memleketpen jáne jumys berýshilermen jumysshylardyń quqyqtaryn qorǵaý máseleleri boıynsha ózara is-qımyl jasaýǵa múmkindik beredi.
— Búginde áleýmettik qorǵaý, ishki turaqtylyq pen azamattardyń ál-aýqatyn arttyrý máseleleri memleket úshin árdaıym basymdyq bolyp qala beredi. Biz halyqaralyq uıymdarmen, sonyń ishinde Halyqaralyq eńbek uıymy men Halyqaralyq kásipodaqtar konfederatsııasynyń usynymdaryn iske asyrý jónindegi birlesken jumysty jalǵastyrýymyz qajet, — dedi Asqarbek Ertaev.
Aıta ketelik elde eń tómengi jalaqy mólsheri 90 myń teńgeden asýy múmkin ekenin jazǵan edik.