Qazaqstan haıýanattar baqtaryna kelýshiler sany qansha
ASTANA. KAZINFORM – Byltyr Qazaqstandaǵy haıýanattar baqtary men okeanarıýmǵa 2,6 mln adam barǵan. Bul kórsetkish 2024 jylmen salystyrǵanda 5,5%-ǵa tómen.
Aıta keteıik, 2024 jyly haıýanattar baqtaryna kelýshiler sany rekordtyq 2,8 mln adamǵa jetken bolatyn. Degenmen, 2025 jylǵy kórsetkish 2015–2023 jyldar aralyǵyndaǵy deńgeıden joǵary saqtaldy.
Statıstıkaǵa sáıkes, 2015 jyly haıýanattar baqtaryna 1,2 mln adam kelse, 2016 jyly bul kórsetkish 1,3 mln adam. Al pandemııaǵa baılanysty shekteýler engizilgen 2020 jyly kelýshiler sany 600 myń adamǵa deıin azaıǵan.
– Ótken jyly kelýshilerdiń basym bóligi elimizdiń úsh iri qalasyna tıesili boldy. Almaty haıýanattar baǵyna 1,1 mln adam, ıaǵnı respýblıkadaǵy barlyq kelýshiniń 42,3%-y barǵan. Shymkentte bul kórsetkish 716,2 myń adamdy, al Astanada 517,4 myń adamdy qurady. Osylaısha, úsh megapolıstegi haıýanattar baqtary men okeanarıýmǵa respýblıka boıynsha barlyq kelýshiniń shamamen 89%-y tıesili boldy, – delingen Energyprom maqalasynda.
Sonymen qatar Shyǵys Qazaqstan oblysyndaǵy haıýanattar baqtaryna 93 myń adam, Aqmola oblysynda 29 myń adam barǵan.
Abaı jáne Qaraǵandy oblystary boıynsha jeke málimetter jarııalanbaǵan. Jalpy respýblıkalyq kórsetkishke súıensek, bul eki óńirdegi haıýanattar baqtaryna birge 173,1 myń adam kelgen.
Aıta keteıik, mamyr aıynyń basynda jazǵy maýsymǵa kóshken Almaty haıýanattar baǵynda tirshilik qaınap jatyr. 1935 jyly negizi qalanyp, 1937 jyly resmı ashylýy bolǵan haıýanattar baǵynda búginde 3,5 myńǵa jýyq janýar ómir súredi.
