Qazaqstan halyqtyq kommýnısteri partııasy kezekten tys Májilis saılaýyn qoldaıdy - V. Kosarev
ASTANA. QazAqparat - Qazaqstan halyqtyq kommýnısteri partııasynyń fraktsııasy kezekten tys Májilis saılaýyn qoldaıdy. Búgin Májilistiń jalpy otyrysynda besinshi saılanǵan Parlament Májilisin taratý jáne jańa saılaýdy taǵaıyndaý týraly QR Prezıdentiniń atyna joldanǵan Úndeýdi talqylaý barysynda «Halyqtyq kommýnıster» partııasy (QHKP) fraktsııasynyń jetekshisi Vladıslav Kosarev osylaı málimdedi.
«Biz de búgin fraktsııada osy máseleni keńinen talqyladyq. Bizdiń partııa Májilisti taratý men kezekten tys saılaýdy qoldaıdy. Óz ustanymdy túsindireıin, birinshiden, álemde jahandyq beıbereketsizdik tónip tur. Halyqaralyq qarjy, ekonomıkalyq daǵdarystyń qurylymdyq sıpaty bar. Imperalıstik álemdegi silkinister jahandyq ekonomıkanyń sıpatyna da, halyqaralyq qatynastarǵa da óz áserin tıgizýde», dedi depýtat.
Onyń aıtýynsha, daǵdarys kezeńinde alańdamaı jumys isteý erekshe mańyzdy.
«Biz halyqtyń óz tańdaýy arqyly partııalarǵa jaýapkershilikti taǵy da naqtylaýyn qalaımyz. Biz udaıy halyqtyq qarajatty únemdi ustaýǵa shaqyryp kelemiz. Sondyqtan da, Májilis pen máslıhat saılaýlaryn biriktirip ótkizý durys dep sanaımyz. Biz óz básekelesterimizben saılaýshylardyń daýysy úshin kúreske túsýge árqashanda daıynbyz!. Sondyqtan da, Elbasyna joldanǵan tarıhı Úndeýdi tolyq qoldaımyz», dedi V. Kosarev.
