Qazaqstan halyqtarynyń birligi kúni merekesine oraı kásipkerler Astana saıabaqtarynda 3700 aǵash ekti
ASTANA. 30 sáýir. QazAqparat /Jasulan Amanbaıuly/ - Qazaqstan halyqtarynyń birligi kúni merekesine oraı kásipkerler Astana saıabaqtarynda 3700 jas tal ekti.
Bul týraly búgin «Elordaǵa arnalǵan aǵash otyrǵyz» aktsııasy barysynda elorda ákiminiń orynbasary Vasılıı Krylov málim etti.
«Bul aktsııa qaladaǵy ekologııalyq aılyq aıasynda ótkizilýde. Sharaǵa qaladaǵy barlyq kásiporyndar men mekemeler qoldaý kórsetti. Bul taza kásipkerlerdiń atsalysýymen ótkizilip otyrǵan bastama desek te bolady. Búgin 3700 aǵash otyrǵyzylady. Ekpe jumystary tek elordadaǵy saıabaqtarda júredi»,-dedi V. Krylov.
Onyń aıtýynsha, aǵashtar jıi ornalasatyn bolsa, olardyń ósimi de jaqsy bolatyny baıqalǵan. Sondyqtan búgingi aktsııa kezinde ákimdik saıabaqtardaǵy aǵashtardyń tyǵyzdyǵyn arttyrýdy sheshken.
Sonymen qatar V.Krylov, qalanyń eski saıabaǵy qaıta jańartýdan ótkizilip jatqandyǵyn habarlady. Astanada aýmaqtary 100 ga jáne 180 ga bolatyn eki jańa saıabaqtyń qurylysy da josparda bar.
«Elordaǵa arnalǵan aǵash otyrǵyz» aktsııasy Astanada ótkiziletin jalǵyz ekologııalyq shara emes. Máselen, qalada jańa týǵan árbir nárestege bir tal kóshet syıǵa tartylatyn kúndelikti aktsııa bar. V. Krylovtyń aıtýynsha, bir jyldyń ishinde jańa týǵan nárestelerdiń qurmetine osyndaı 8 myń kóshet egilgen.
