Qazaqstan halyqaralyq túrme reıtınginiń kórsetkishi boıynsha 57-shi orynda - A.Daýylbaev (FOTO)

ASTANA. QazAqparat - Qazaqstan halyqaralyq túrme reıtınginiń kórsetkishi boıynsha 57-shi orynǵa shyǵyp otyr. Búgin Astanada ótip jatqan «Túrme reformasyna» arnalǵan ІIІ forým barysynda QR Bas prokýrory Ashat Daýylbaev osylaı málim etti. Eske sala keteıik, «Sen qoǵamǵa kereksiń! Ty nýjen obşestvý! Sosiety needs you!» atty jobanyń bastaýyna arnalatyn bul forým buryn sottalǵan adamdardy zańǵa baǵynýshy azamattar retinde qoǵamǵa reıntegratsııalaýǵa baǵyttalǵan.

«Bul bizdiń úshinshi jyl saıynǵy forým, munyń ózi jalpy qoldaýdyń arqasynda tıimdi dıalog alańyna aınaldy. Bul alańda penıtentsıarlyq salanyń neǵurlym ótkir problemalary talqylanyp qana qoımaı, óz sheshimin de taýyp jatady. Buǵan munyń aldynda «túrme halqyn» azaıtýǵa jáne sottalǵandardy jumyspen qamtamasyz etý máselelerine arnalyp ótkizilgen forýmdar dálel bola alady», - dep atap ótti Bas prokýror. Onyń aıtýynsha, 2013 jyly «Túrme ornyna - probatsııa jáne elektrondy bilezikter» taqyrybymen ótken Birinshi forýmnyń aıasynda bizdiń «Túrme halqyn» azaıtý jónindegi 10 shara» jobasyn usynylǵan bolatyn. Ondaǵy jospar boıynsha Qazaqstan 4 jyldyń ishinde túrme ındeksi boıynsha 50 eldiń qatarynan alyp shyǵý týraly batyl mindetteme alǵan edi. «Bul mindetti biz merziminen buryn oryndap shyqtyq. Tarıhqa kóz júgirteıik. 1995 jyly Qazaqstan túrme halqynyń ındeksi boıynsha AQSh pen Reseıden keıingi úshinshi orynda turdy. 2012 jyly bizdiń el 33-shi orynǵa shyqty. Búgingi tańda Qazaqstan halyqaralyq túrme reıtınginiń kórsetkishi boıynsha 57-shi orynda. Osylaısha biz kórsetkishteri halyqaralyq sarapshylar tarapynan eshqashan syn týdyrmaǵan Latvııa, Estonııa jáne Sıngapýr sııaqty memleketterdiń qataryna kóterildik», - dedi A.Daýylbaev. Eske sala keteıik, forýmdy Parlament Májilisiniń Sot-quqyqtyq reforma jáne zańnama komıteti, Joǵarǵy Sot, Іshki ister mınıstrligi, «Nur Otan» partııasy janyndaǵy Quqyqtyq keńes, EYQU-nyń Astanadaǵy Keńsesi jáne Bas prokýratýranyń janyndaǵy Quqyq qorǵaý organdarynyń akademııasy uıymdastyryp otyr. Uıymdastyrylyp otyrǵan bul forým budan buryn ótken jıyndar sııaqty Memleket basshysynyń penıtentsıarlyq júıeni reformalaý aıasyndaǵy tapsyrmalaryn iske asyrýǵa arnalǵan jáne buryn sottalǵan adamdardy qaıta áleýmettendirý júıesiniń tıimdiligin arttyrýǵa baǵyttalǵan.