Qazaqstan Halyqaralyq medıtsınalyq-sanıtarlyq erejelerdi júzege asyrýda úlken jetistikke jetip otyr - sheteldik sarapshylar
ALMATY. 31 qazan. QazAqparat - Qazaqstan Dúnıejúzilik densaýlyq saqtaý uıymyna Halyqaralyq medıtsınalyq-sanıtarlyq erejelerdi (HMSE) júzege asyrý merzimin uzartýdy usynyp otyrǵan elder qataryna qosyldy. Bul týraly búgin Almatyda ótip jatqan HMSE-ni júzege asyrý boıynsha kóp tarapty memleketaralyq semınarda aıtyldy.
«Bizde HMSE-niń zańdyq máseleleri boıynsha mol tájirıbe bar. Zańnamamen shektelmeı, kez-kelgen ózge de máseleler boıynsha saýal qoıýǵa bolady. Biz HMSE barshańyzǵa birdeı tolyq túsinikti emes ekenin jaqsy bilemiz», - deıdi Dúnıejúzilik densaýlyq saqtaý uıymy (DDU) shtab-páteriniń ýákili Brıýs Plotkın. Onyń aıtýynsha, HMSE-ni júzege asyrýda Qazaqstan birshama jetistikke qol jetkizdi. Sondyqtan bul semınardy óz elinde ótkizip, oǵan tóraǵalyq etýde. Qazaq eli búgingi tańda Dúnıejúzilik densaýlyq saqtaý uıymyna ony júzege asyrýdyń merzimin uzartýdy usynyp otyrǵan 21-shi el bolyp otyr. Bul ótinish 30 qazan kúni jasalǵan bolatyn. Jalpy qazir onda burynǵy keńestik respýblıkalardan Grýzııa men Qazaqstan ǵana bar. Al ózge elder HMSE-ni júzege asyrýǵa qatysty áli naqty óz usynystaryn jasaǵan joq. Sondyqtan bul elderdiń tájirıbesine DSU silteme jasaı almaıdy.
