Qazaqstan halyqaralyq keden standarttaryn jetildirý jumysyna qatyspaq

NUR-SULTAN. QazAqparat - Qazaqstan halyqaralyq keden standarttaryn jetildirý jumysyna qatysýǵa nıetti. Bul týraly QR Qarjy mınıstrligi Memlekettik kirister komıteti tóraǵasynyń orynbasary Ómirzaq Beıispekov aıtty, dep habarlaıdy QazAqparat tilshisi.

«Qazaqstan bıznes-protsesterdi tsıfrlandyrý boıynsha aýqymdy jumys júrgizip jatyr. 2018 jyldyń 1 qańtarynan «ASIKÝDA» BUU ıÝNKTAD tuǵyrnamasy negizinde qurylǵan «Astana-1» aqparattyq júıesine taýarlardy elektrondyq deklaratsııalaýdy engizdi», - dedi ol Erkin ekonomıkalyq aımaqtar boıynsha Dúnıejúzilik keden uıymynyń óńirlik forýmy barysynda.

Sonymen qatar ol bıylǵy jyldyń sáýirinde Qazaqstanda «Eksporttyq-ımporttyq operatsııalar boıynsha bir tereze» aqparattyq júıesi engizilgenin aıtty. Atalǵan júıe «biryńǵaı tereze» boıynsha Dúnıejúzilik keden uıymynyń standarttary men kompendıýmdary negizinde ázirlengen.

«Qazirgi ýaqytta syrtqy ekonomıkalyq qyzmet pen erkin ekonomıkalyq aımaqqa qatysýshylar atalǵan júıe arqyly barlyq ruqsat qujattaryn alady. Ol 13 aqparattyq resýrsty biriktiredi jáne Qazaqstannyń 11 memlekettik aqparattyq júıesimen yqpaldastyrylǵan», - dedi komıtet tóraǵasynyń orynbasary.

Ó.Beıispekov QR QM Memlekettik kirister komıteti Dúnıejúzilik keden uıymy men halyqaralyq keden qoǵamdastyǵynyń erkin aımaqtardy ákimshileý salasyndaǵy halyqaralyq keden standarttaryn ázirleý men odan ary jetildirýge baǵyttalǵan sharalaryna kez kelgen kómek kórsetýge daıyn ekendigin aıtty.