Qazaqstan halyqaralyq JCI negizinde otandyq medıtsınalyq standarttardy jasaqtaıdy - E.Orynbaev
ASTANA. 30 sáýir. QazAqparat - Qazaqstan halyqaralyq JCI negizinde otandyq medıtsınalyq standarttardy jasaqtaıdy. Bul týraly búgin "QazAqparat" tilshisine bergen suhbatynda QR Premer-Mınıstriniń orynbasary Erbol Orynbaev málim etti.
"Jaqyn bolashaqta biz "Ulttyq medıtsınalyq holdıng" AQ quramyna engen barlyq klınıkalardy halyqaralyq JCI standarttaryna sáıkes akkredıtteýdi josparlap otyrmyz", - dedi E.Orynbaev Astanadaǵy "Respýblıkalyq neırohırýrgııalyq ǵylymı ortalyǵyna" Halyqaralyq Birikken Komıssııanyń (Joint Commission International, JCI) sertıfıkatyn tabystaý rásiminde.
Onyń aıtýynsha, qazirgi ýaqytta Respýblıkalyq neırohırýrgııalyq ǵylymı ortalyǵy jáne Ana men bala ulttyq ǵylymı ortalyǵy JCI sertıfıkattaryna ıe boldy, endi taǵy 3 klınıka atalǵan sapa standarttaryn alýǵa qamdanýda.
"Sonymen qatar keleshekte ózimizdiń ulttyq medıtsınalyq standarttardy jasaqtaý josparlanýda. Olar JCI standarttaryna qaraǵanda sál jeńildeý bolady. Sebebi JCI talaptary óte qatal. Bul klınıkalarǵa arnalǵan bizdiń otandyq standarttar bolady. Biz Respýblıkalyq neırohırýrgııalyq ǵylymı ortalyǵy Halyqaralyq JCI sertıfıkatyna ıe bolǵanyna qýanyshtymyz. Bul medıtsınalyq qyzmetterdiń asa joǵary sapasy, dúnıejúzilik deńgeıdiń shyńy", - dep túıdi sózin E.Orynbaev.
Eske sala keteıik, búgin Astanadaǵy "Respýblıkalyq neırohırýrgııalyq ǵylymı ortalyǵy" AQ Halyqaralyq Birikken Komıssııanyń (Joint Commission International, JCI) sertıfıkatyna ıe bolǵan bolatyn. JCI standartyna TMD elderinde tek 3 klınıka qol jetkizdi. Sonyń ishinde ekeýi qazaqstandyq klınıkalar. Atalǵan sertıfıkattardyń berilýi bul klınıkalyq ortalyqtardyń joǵary halyqaralyq qaýipsizdik jáne sapa standarttary boıynsha qyzmet etetindigin kórsetedi jáne dúnıejúzinde moıyndalady. Búginde dúnıejúziniń 90-nan astam elinde 450-ge jýyq medıtsına uıymy JCI akkredıtatsııasyn aldy.
