Qazaqstan halyqaralyq energetıkalyq jáne azyq-túlik qaýipsizdigin qamtamasyz etýdegi úlesin arttyra túsedi

NUR-SULTAN. QazAqparat – Ankara qalasynda Túrki memleketteri uıymyna (TMU) múshe elderdiń Qaýipsizdik keńesteri hatshylarynyń birinshi kezdesýi ótti, dep habarlaıdy QazAqparat Aqordaǵa silteme jasap.

Іs-shara barysynda energetıka, kólik, azyq-túlik qaýipsizdigi, terrorızm qaterine qarsy is-qımyl jáne óńirlik qaýipsizdiktiń basqa da ózekti máseleleri talqylanyp, ony nyǵaıtýdyń yqtımal sharalary qarastyryldy.

Kezdesýde QR Prezıdentiniń kómekshisi – Qaýipsizdik Keńesiniń hatshysy Ǵızat Nurdáýletov Qazaqstannyń óńirlik qaýipsizdik salasyndaǵy negizgi problemalardy sheshýge qatysty ujymdyq tásilderdi qalyptastyrýǵa baǵyttalǵan kópvektorly syrtqy saıasatty júzege asyratynyn atap ótti.

Elimiz halyqaralyq energetıkalyq jáne azyq-túlik qaýipsizdigin qamtamasyz etý isine qosatyn úlesin arttyryp, óniminiń negizgi túrlerin jetkizýde olqylyqtarǵa jol bermeý maqsatymen halyqaralyq kóliktik-logıstıkalyq baǵyttardy damytý jumystaryn jalǵastyratynyn málimdedi.

Terrorızm men ekstremızmniń, sonyń ishinde aýǵan aýmaǵynan taralýy óńirdegi qaýipsizdik pen turaqtylyqqa qaýip tóndiretin táýekel-qaterlerdiń biri bolyp qala beredi. Osyǵan baılanysty jıynda Aýǵanstandy áleýmettik-ekonomıkalyq turǵydan qalpyna keltirýge jáne osy eldegi jaǵdaıdy tez arada retteýge erekshe nazar aýdaryldy.

Kezdesý sońynda delegatsııalardyń basshylaryn Túrkııa Prezıdenti Rejep Taııp Erdoǵan qabyldady. Túrkııa Respýblıkasynyń Prezıdenti qurlyqtaǵy geosaıası qaterlerdiń shıelenisýi jaǵdaıynda jańa ıntegratsııalyq tetikterdi qalyptastyrýdyń mańyzdy ekenin atap ótip, Túrki memleketteri uıymynyń barlyq qatysýshylarymen aradaǵy ózara qarym-qatynastyń oń qarqynyna toqtaldy.

Sondaı-aq, is-shara aıasynda Qaýipsizdik Keńesteriniń hatshylary Túrkııanyń Іshki ister mınıstrliginiń jáne Ulttyq barlaý uıymynyń basshylyǵymen kezdesti, Túrik memlekettik aeroǵarysh kompanııasyna bardy.

Foto: akorda.kz