Qazaqstan halyqaralyq baılanystar máselesinde áldeqashannan-aq bastaýysh synyptardyń oqýshysy emes - Astana Sammıtine qatysty ǵalym pikiri
ANA. 10 jeltoqsan. QazAqparat /Gúlmıra Álıakparova/ - Qazaqstan halyqaralyq baılanystarda áldeqashannan-aq bastaýysh synyptardyń oqýshysy emes. Bul pikirin búgin Astanada ótken dóńgelek ústel otyrysy barysynda tarıh ǵylymdarynyń kandıdaty Sergeı Selıverstov bildirdi.
«Astana Sammıti jáne bolashaq týraly dıalog» taqyrybynda QR Bilim jáne ǵylym mınıstrligi Memleket tarıhy ınstıtýty uıymdastyrǵan dóńgelek ústel basyna belgili saıasattanýshylar, tarıhshylar men qoǵam qaıratkerleri jınalyp, Qazaq eli men Eýropadaǵy qaýipsizdik jáne yntymaqtastyq uıymynyń shejiresine altyn áriptermen jazylatyn Astana Sammıti men onda qabyldanǵan tarıhı qujat - Deklaratsııa jaıynda óz pikirlerin ortaǵa saldy.
Óz oıyn bildirgen S.Selıverstov, 1999 jyldan beri EQYU tóraǵalyǵynyń tizginin ártúrli elder alǵanymen, olardyń eshqaısysy joǵary deńgeıdegi basqosýdy uıymdastyrý quqyǵyna ıe bola almaǵanyn aıtty. Sondyqtan Eýropalyq Uıymǵa múshe - Azııa eli - Qazaqstannyń Sammıtti ótkizý týraly usynysyn sarapshylar qoǵamdastyǵy kúmánmen qabyldady.
«Kóbisi bul usynys júzege aspaıtynyna senimdi boldy, kóbisi - ony qalamady. Ne degenmen, Qazaqstan alpaýyt elder basshylarynyń qoldaýyna ıe boldy. Mine sol sebepten de, bizdiń el EQYU-nyń tarıhyna enýi tıis. Onymen birge, Qazaqstan EQYU-ǵa qatysýshy elderdiń pikir almasý alańy ǵana bolǵan joq, jalpy eýropalyq daǵdarysty eńserýge súbeli úles qosty. Sondaı-aq Eýropa úlken Eýrazııa qurylyǵynan jeke ómir súrip, óziniń qaýipsizdigin bólek qurastyra almaıtyndyǵyn aıqyndady. Sondyqtan, Qazaqstan ózine tym joǵary mejeni tańdap aldy dep qam jeýdiń qajeti joq. Qazaqstan halyqaralyq baılanystarda álde qashannan alǵashqy synyptardyń oqýshysy emes. Jáne de oǵan eldiń syrtqy saıasatta tek bastama kóterip qana qoımaı, olardy is júzine asyryp otyrǵan jumystary dálel. Dál osylaısha Astana Sammıti de uıymdastyryldy», - deıdi ol.
S.Selıverstov, bul Sammıtpen Qazaqstan óziniń syrtqy jáne ishki bedelin arttyrýdy kózdedi degen pikirlerge qarsylyq aıtpaıtynyn, kerisinshe olardy qýattaıtyndyǵyn jetkizdi. Sebebi iri alpaýyt elderdiń bedeliniń ózi álem olardy qalaı qabyldaıtyndyǵyna tikeleı baılanysty.
