Qazaqstan halyqaralyq azyq-túlik habyna aınala ma
«Búgingi is-sharany ótkizýdegi maqsat – Taıaý Shyǵys elderine Islam elderinen ınvestıtsııalar tartý protsesin jedeldetý, jandandyrý. 2009-2010 jyldary ıslam qarjylandyrý týraly zań qabyldandy. Biraq, zańnyń belgili bir tarmaqtary boıynsha tolyq qoldaýdyń bolmaýyna baılanysty máseleler toqtatyldy. Degenmen, Astana halyqaralyq qarjy ortalyǵy qyzmetiniń damı túsý sátinen beri is qaıta jandana bastady. Bıyl Sýkýk sertıfıkattary boıynsha sharıǵatqa sáıkes Islam áleminen ınvestıtsııalar tartý júzege asyrylyp jatyr», - dedi Erlan Baıdáýlet Syrtqy ister mınıstrliginde Islam azyq-túlik qaýipsizdigi uıymynyń uıytqy bolýymen ótken semınar barysynda.
Uıym basshysynyń aıtýynsha, Islam áleminen ınvestıtsııalar tartý úrdisi álem boıynsha belsendi júrip jatyr.
«Qazaqstanǵa kelsek, maýsymnyń basynda alǵash ret lızıngtik operatsııalardy damytý úshin 2 mlrd teńge somasynda Sýkýk sertıfıkattary berildi. Bul – baǵaly qaǵazdar ulttyq valıýtada shyǵarylǵan alǵashqy pretsedent. 2011 jyly Qazaqstan damý banki damýynyń bastapqy kezeńinde Qazaqstanǵa malaızııa valıýtasynda Sýkýk sertıfıkaty tartylǵan edi. Osy oraıda, Taıaý Shyǵystaǵy ınvestorlardyń ıslam qarjy quraldary arqyly ınvestıtsııa tartýǵa degen qyzyǵýshylyǵy biz úshin ózekti.
Islam azyq-túlik qaýipsizdigi uıymy Qazaqstandy halyqaralyq azyq-túlik haby retinde damytý boıynsha tıisti jumys júrgizip jatyr. Bul baǵytty damytý mańyzdy jáne búgingi shara Taıaý Shyǵys ınvestorlarymen ózara árekettesýde septigin tıgizedi», - dedi Erlan Baıdáýlet.
Aıta ketsek, Syrtqy ister mınıstrliginde Islam azyq-túlik qaýipsizdigi uıymynyń uıytqy bolýymen «Aýyl sharýashylyǵyna ınvestıtsııa salý úshin Sýkýk» atty semınar ótti. Atalǵan sharaǵa quzyrly memlekettik organdar ókilderi, sala sarapshylary men sheteldik meımandar qatysty.
