Qazaqstan Halyqaralyq áskerı medıtsına komıtetine baqylaýshy boldy
Elimizdiń kandıdatýrasyn osy úkimetaralyq uıymǵa múshe 119 memlekettiń barlyǵy qoldady.
2022 jyly QR Belgııadaǵy Elshiliginiń bastamasymen QR Syrtqy ister mınıstrligi QR Qorǵanys mınıstrligimen birlese memleketimizdiń tıisti ótinishin engizýdi pysyqtady. Aǵymdaǵy jyldyń 5-9 qyrkúıegi aralyǵynda uıymnyń Brıýsselde ótken kezekti álemdik kongresi barysynda múshe memleketter ony oń baǵalaǵan.
Qazaqstan delegatsııasyna arnaǵan sózinde HÁMK 44-shi álemdik kongresiniń tóraǵasy Devıd Smıt Qazaqstannyń áskerı-medıtsınalyq qyzmeti áskerı medıtsına salasyndaǵy halyqaralyq yntymaqtastyqqa mazmundy úles qosa alatynyna senimdi ekenin jetkizdi.
Óz kezeginde, kezdesýge qatysýshylar aldynda sóz sóılegen Qazaqstannyń Belgııadaǵy Elshisi Marǵulan Baımuhan HÁMK-ke baqylaýshy mártebesin alý qazaqstandyq mamandarǵa uıymnyń múshe memleketterdiń áskerı-medıtsınalyq qyzmetteriniń kásibı deńgeıin kóterýge baǵyttalǵan barlyq is-sharalaryna qatysýǵa múmkindik beretinin jáne osy mańyzdy salada tájirıbe almasý úshin paıdaly alańdy qamtamasyz etetinin basa aıtty.
Qazaqstan Respýblıkasynyń Qarýly Kúshterinde áskerı qyzmetshilerdiń densaýlyǵyn qorǵaý jáne medıtsınalyq járdemge quqyqtaryn iske asyrýdy qamtamasyz etetin medıtsınalyq qamtamasyz etýdiń kóp deńgeıli júıesi qalyptasqan jáne senimdi jumys isteýde. Búginde Qazaqstannyń áskerı medıtsına júıesi 20 áskerı-medıtsınalyq mekemeni jáne 130-dan astam medıtsınalyq bólimsheni qamtıdy.
Aıta ketsek, HÁMK álemdegi qarýly kúshterdiń medıtsınalyq qyzmetteri arasyndaǵy yntymaqtastyqty nyǵaıtý maqsatynda 1921 jyly qurylǵan. Komıtet jarǵysy men tarıhı dástúrine sáıkes Bas hatshysynyń keńsesi Belgııada ornalasady. Bul halyqaralyq uıym BUU, Dúnıejúzilik densaýlyq saqtaý uıymy jáne Halyqaralyq Qyzyl Krest Komıtetimen tyǵyz yntymaqtastyqta. Onyń negizgi mindetteri – barlyq memleketterdiń áskerı medıtsınalyq qyzmetteri arasyndaǵy kásibı yntymaqtastyq baılanystaryn nyǵaıtý; ǵylymı zertteýlerdi ilgeriletý; áskerı medıtsına úshin mańyzdy máseleler boıynsha oqytý, atap aıtqanda qarýly kúshterdiń medıtsınalyq qyzmetiniń jas ofıtserleriniń biliktiligin arttyrý kýrstaryn uıymdastyrý .
