Qazaqstan Halyq partııasy shyń basynda erekshe shara ótkizdi

ALMATY. QazAqparat –Búgin, 13 jeltoqsanda Qazaqstan Halyq partııasy Almaty qalalyq fılıaly men «Kırov» áskerı-patrıottyq klýbynyń ókilderi ońtústik astananyń mańyndaǵy taýlarda úgit-nasıhat sharasyn ótkizdi, dep habarlaıdy QazAqparat QHP Almaty qalalyq komıtetine silteme jasap.

Belsendiler toby Fýrmanov shyńyna (bıiktigi shamamen 3000 metr) kóterilip, shyń basyna QHP sımvolıkasy beınelengen úgit-nasıhat bannerin ornalastyrdy. Іs-shara Qazaqstan Halyq partııasynyń saılaýaldy naýqany aıasynda uıymdastyryldy.

QHP Almaty qalalyq fılıalynyń basshysy Álibek Shapenov atap ótkendeı, úgit-nasıhattyń mundaı formaty tekten tek tańdalyp alynǵan joq.

– Syrttan qaraǵanda, mundaı áreket erekshe kórinýi múmkin. Biraq biz úshin taý shyńdaryn baǵyndyrý dástúrge aınalǵan dúnıe, – dedi ol.

Sondaı-aq QHP men «Kırov» klýby mundaı birlesken sharany buryn da birneshe ret uıymdastyrǵan bolatyn. Olar buǵan deıin «Týrıst» shyńyn (3954 metr) jáne «Pıoner» shyńyn (4031 metr) baǵyndyrǵan edi. Bul joly jyldyń mezgili men aýa raıyn eskerip, Fýrmanov shyńyn baǵyndyrý qolǵa alyndy.

Temperatýranyń tómendigi men taý joldarynyń qattylyǵy tańdalǵan marshrýttyń kúrdeli bolatynyn birden baıqatty. Dese de dittegen maqsatqa jetpeı tyńbaıtyn tabandy alpınıster shyńdy oıdaǵydaı baǵyndyrdy.

QHP Almaty qalalyq fılıaly Jastar qanatynyń jetekshisi Tursynǵalı Áliptiń aıtýynsha, bul jolǵy úgit-nasıhat sharasy romantıkalyq ári patrıottyq sarynda órbidi.

– Almaty – taýly shahar. Qalalyqtar salaýatty ómir saltyn, demalystyń osyndaı túrlerin jaqsy kóredi. Biz de osy údeden shyǵýǵa tyrysamyz, – deıdi ol.