Qazaqstan halyq partııasy saılaýaldy baǵdarlamasyn bekitti
«Búgin biz, Halyq partııasy, saıası partııalardyń ishinde saılaý aldyndaǵy sezdi birinshi bolyp ótkizip otyrmyz. Birinshi bolýdyń jaýapkershiligi – úlken, júgi – aýyr. Al birinshi bolý – bizdiń saıası alańdaǵy vızıttik kartochkamyz bolyp ketti. Barshańyzǵa belgili, byltyr Halyq partııasy Memleket basshysynyń Prezıdent jáne Parlament saılaýy týraly bastamasyn birinshi bolyp qoldady. Saılaýda Qasym-Jomart Toqaevtyń kandıdatýrasyn qoldaýǵa halyq koalıtsııasyn qurýdy birinshi bolyp Halyq partııasy usyndy», - dedi sezde sóz sóılegen partııa tóraǵasy Ermuhamet Ertisbaev.
Onyń atap ótýinshe, partııa áliptiń artyn baǵý baǵytyn ustanbaıdy ári tabandy kúreske daıyn.
«Babalarymyzdyń «Birlik bolsa – tirlik bolady» degen amanat ósıeti bar. Árıne, barshamyzǵa birlik kerek! Degenmen, demokratııa jaǵdaıynda Parlament saılaýynda plıýralızm, ıaǵnı pikir alýandyǵy qajet. Ár partııa ózi úshin kúresedi. Kúres degenimiz – dıalektıkanyń birinshi zańy. Tek saıası kúrespen ǵana birlikke qol jetkize alamyz. Sondyqtan men osy maqaldy sál ózgertip, «Kúres arqyly – birlik bolady. Birlik bolsa – tirlik bolady» dep aıtar edim. Jalpy alǵanda, birlik pen bereke kúres arqyly keledi. Biz – ulanǵaıyr jerimizdi aq bilektiń kúshimen, aq naızanyń ushymen qorǵaǵan kúresker, batyr babalardyń urpaǵymyz. Sondyqtan da aıtarym – biz tabandy kúres jolyna túsemiz, biz halyq múddesin jaqtaımyz», - dedi ol.
Osydan keıin Ermuhamet Ertisbaev sezd delegattaryna partııanyń saılaýaldy baǵdarlamasyn bekitýdi usynyp, ol biraýyzdan qoldaý tapty.
